بۇگىن الماتىدا ايگىلى قازاقستاندىق سپورتشى، قىسقى وليمپيادانىڭ قولا جۇلدەگەرى دەنيس تەننىڭ جارقىن بەينەسىنە ارنالعان مانەرلەپ سىرعاناۋدان VI-شى حالىقارالىق «Denis Ten Memorial Challenge» ءتۋرنيرى سالتاناتتى تۇردە اشىلدى. «حالىق ارەنا» مۇز ايدىنىندا سپورت فەدەراسيالارىنىڭ وكىلدەرى، رەسمي تۇلعالار، قۇرمەتتى قوناقتار مەن مانەرلەپ سىرعاناۋ جانكۇيەرلەرى باس قوستى.
سالتاناتتى ءىس-شارادا «قازاقستاندىق مانەرلەپ سىرعاناۋ وداعى» فەدەراسياسىنىڭ پرەزيدەنتى باۋىرجان ەرالى جانە قازاقستان ۇلتتىق وليمپيادا كوميتەتى باس حاتشىلىعىنىڭ حاتشىسى ءالىمجان اقايەۆ قۇتتىقتاۋ ءسوز سويلەپ، ءتۋرنيردىڭ ەل سپورتى ءۇشىن ماڭىزى مەن جاس دارىنداردى قولداۋداعى ءرولىن اتاپ ءوتتى.
ءتورت كۇنگە سوزىلاتىن جارىسقا 18 ەلدەن كەلگەن 130-دان استام سپورتشى قاتىسادى. مۇز ايدىنىندا قازاقستاننىڭ ۇزدىك مانەرلەپ سىرعاناۋشىلارى دا، الەمدىك جۇلدىزدار دا ونەر كورسەتپەك. ولاردىڭ قاتارىندا امەريكالىق ايگىلى سپورتشى دجەيسون براۋن مەن وڭتۇستىك كورەيا چەمپيونى چا دجۋنحۆان بار.كورەرمەن نازارى – الماتىلىق مانەرلەپ سىرعاناۋشى ميحايل شايدوروۆقا اۋدى. ول 2025 جىلعى ءتورت قۇرلىق چەمپيوناتىنىڭ جەڭىمپازى، الەم چەمپيوناتىنىڭ كۇمىس جۇلدەگەرى، سونداي-اق Grand Prix جانە Challenger Series دودالارىنىڭ بىرنەشە دۇركىن جەڭىمپازى. ميحايل شايدوروۆ قازاقستاندىق ەرلەر مانەرلەپ سىرعاناۋىنىڭ كوشباسشىسى سانالادى. ونىڭ تۋرنيرگە قاتىسۋى ەلىمىزدىڭ مانەرلەپ سىرعاناۋ مەكتەبىنىڭ ساباقتاستىعى مەن جوعارى دەڭگەيىن ايقىندايدى.
جارىس سوڭىندا ەڭ ۇزدىك سپورتشىلار قاتىساتىن كەشكى گالا-شوۋ وتەدى. كورەرمەندەردى اسەرلى قويىلىمدار، توسىنسىيلار مەن مەرەكەلىك كوڭىل-كۇي كۇتىپ تۇر. بۇل سپورتتىق مەرەكە الماتى تۇرعىندارى مەن قوناقتارىنىڭ ەسىندە ۇزاق ساقتالارى ءسوزسىز.