الماتىدا دەمالىس كۇندەرى وتەتىن جارمەڭكەلەردە ۆەتەرينارلىق-سانيتارلىق جانە ۇيىمداستىرۋشىلىق باقىلاۋ جۇرگىزىلەدى، - دەپ حابارلايدى aqshamnews.kz ءتىلشىسى.
«الماتى» اكك ۆەتەريناريالىق-سانيتاريالىق باقىلاۋ سالاسىنداعى ۋاكىلەتتى ورگاندارمەن، سونداي-اق اۋدان اكىمدىكتەرىمەن بىرلەسىپ اپتا سايىن الماتى قالاسىنداعى دەمالىس كۇندەرى وتەتىن جارمەڭكەلەردە باقىلاۋ جۇمىستارىن جۇرگىزەدى.
اشۋ الدىندا جاۋاپتى قىزمەتكەرلەر ەت، بالىق، ءسۇت ونىمدەرى، جۇمىرتقا جانە باسقا دا تەز بۇزىلاتىن ازىق-تۇلىك ونىمدەرىنە ۆەتەريناريالىق انىقتامالاردى جانە فەرمەرلەردىڭ سەرتيفيكاتتارىن تەكسەرەدى، ساقتاۋ شارتتارىن، تەمپەراتۋرالىق رەجيمنىڭ ساقتالۋىن جانە قاپتامانىڭ بۇتىندىگىن باقىلايدى، قاجەت بولعان جاعدايدا بالعىندىق پەن قاۋىپسىزدىككە ەكسپرەسس-سىنامالار جۇرگىزەدى.
ءونىمدى ساتۋعا ۋاكىلەتتى قىزمەتكەرلەرمەن كەلىسىلگەننەن كەيىن عانا رۇقسات ەتىلەدى. بۇزۋشىلىقتار انىقتالعان جاعدايدا تاۋار الىنادى، ال ساتۋشىنىڭ قىزمەتى توقتاتىلادى.
سونىمەن قاتار، جارمەڭكەلەردە ساۋدا الاڭدارىنىڭ سانيتارلىق جاعدايى، جۇمىس رەجيمى، ستيحيالىق ساۋدانىڭ الدىن الۋ تۇراقتى باقىلاۋدا.
دەمالىس جارمەڭكەلەرى ءار سەنبى جانە جەكسەنبى كۇندەرى ساعات 08:00-دەن 18:00-گە دەيىن وتكىزىلەدى. جارمەڭكەگە شىعارىلاتىن ونىمدەر دەلدالداردى اينالىپ ءوتىپ، تىكەلەي شارۋالار مەن وڭدەۋ زاۋىتتارىنان جەتكىزىلەدى، بۇل باعانى نارىقتىق باعادان تومەن ۇستاۋعا مۇمكىندىك بەرەدى.
جارمەڭكە مەكەنجايلارى:
• المالى اۋدانى: ماسانچي كوشەسى، گوگول كوشەسى مەن ايتەكە بي كوشەسىنىڭ اراسى
• بوستاندىق اۋدانى: «قازاقفيلم» شاعىن اۋدانى، يسينالييەۆ كوشەسى
• اۋەزوۆ اۋدانى: اباي داڭعىلى مەن وتەگەن باتىر كوشەسىنىڭ قيىلىسى
• مەدەۋ اۋدانى: مەڭدىقۇلوۆا بۋلۆارى، بەكتۇروۆ كوشەسىنىڭ قيىلىسى
• الاتاۋ اۋدانى – «مادەنيەت» تۇرعىن ءۇي كەشەنى.