الماتىدا جوندەۋدەن وتكەن جاندوسوۆ جانە تۇرعىت ءوزال كوشەلەرىندە قوزعالىس اشىلدى
الماتىدا قالا كوشەلەرى مەن جولداردى ورتاشا جوندەۋ جۇمىستارى جالعاسىپ كەلەدى. ءقازىر 95 كوشە جوندەلىپ، تاعى 100-دەن استام كوشەگە جۇمىستار جۇرگىزىلۋدە. بيىل 250 شاقىرىم بولاتىن 274 كوشە ورتاشا جوندەۋدەن ءوتتى. وسىلايشا، جاقسى جانە قاناعاتتانارلىق جاعدايداعى جولدىڭ ۇلەسىن 92%-عا دەيىن جەتكىزۋ جوسپارلانعان.
مىسالى، وتكەن دەمالىس كۇندەرى ءۇش ماگيسترالدى كوشەنىڭ ءبىر بولىگى مەرزىمىندە جوندەلىپ، كولىك قوزعالىسى تولىق اشىلدى.
بۇل رىسقۇلوۆ كوشەسىمەن قيىلىساتىن جولايىرىقتان حاليۋللين كوشەسىمەن قيىلىساتىن جولايىرىققا دەيىنگى قۇلجا تاس جولىنىڭ بولىگى. تاعى ءبىر كوشە – رايىمبەك داڭعىلىنان تولە بي كوشەسىنە دەيىنگى تۇرعىت ءوزال كوشەسىنىڭ بولىگى. سونداي-اق، جاندوسوۆ كوشەسىنىڭ ياسساۋي كوشەسىنەن ساين كوشەسىنە دەيىنگى ۋچاسكەسىنە جوندەۋ جۇمىستارى جۇرگىزىلدى.
ايتا كەتۋ كەرەك، 20 ماگيسترالدى كوشەنىڭ جوندەۋ جۇمىستارىندا جول توسەمىنىڭ بەرىكتىگىن ارتتىرۋعا باعىتتالعان پوليمەراسفالتبەتون قولدانىلدى. جول تاڭبالارى ماتەريالدارىن ءوندىرۋشى زاۋىتتىڭ تالابىنا سايكەس، جوندەلگەن ۋچاسكەلەرگە جول تاڭباسى 15-20 كۇننەن كەيىن سىزىلادى.
ەستەرىڭىزگە سالا كەتەيىك، قوزعالىستى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram ارناسىندا، اۋداندىق اكىمدىكتەر مەن باسقارمالاردىڭ الەۋمەتتىك جەلىلەرىندە، سونداي-اق 2GIS پەن «ياندەكس كارتالار» سەرۆيستەرىندە جازىلعان.