الماتىداعى جەتىنشى اۋرۋحانا دارىگەرلەرى ومىرتقاسى قاتتى زاقىمدانعان ناۋقاستاردى شاعىن ءينۆازيۆتى تاسىلدەرمەن ەمدەپ جاتىر
بۇگىندە «ومىرتقا جارىعى»، «مويىن ستەنوزى»، «بەل ومىرتقا ستەنوزى»، «ومىرتقانىڭ جىلجۋى» سىندى دياگنوزداردى بىلمەيتىن ادام كەمدە-كەم. مۇنداي اۋرۋعا شالدىققان ناۋقاستار دارى-دارمەك كومەكتەسپەگەن جاعدايدا حيرۋرگيالىق وپەراسياعا جۇگىنۋگە ءماجبۇر بولادى. كەز-كەلگەن وتا سالدارى وڭاي بولمايتىنى بەلگىلى، سوندىقتان دارىگەرلەر ەمنىڭ پاسيەنت دەنساۋلىعى ءۇشىن ءتيىمدى ءتاسىلىن تاڭداپ الۋعا تىرىسادى.
وڭتۇستىك استاناداعى №7 قالالىق كلينيكالىق اۋرۋحانادا وتكەن شەبەرلىك كلاسى بارىسىندا مويىن ستەنوزى، بەل ومىرتقا كانالىنىڭ تارىلۋى سىندى دەرتكە شالدىققان پاسيەنتتەرگە شاعىن ءينۆازيۆتى وتالار جاسالدى. وعان استاناداعى ۇلتتىق نەيروحيرۋرگيا ورتالىعى مەن الماتىداعى كوپبەيىندى اۋرۋحانالاردىڭ نەيروحيرۋرگتەرى قاتىستى.
ەكى كۇندىك شەبەرلىك كلاسى بارىسىندا اسا اۋىر كلينيكالىق ناۋقاستارعا 3 وتا جاسالدى. وتا بارىسىندا ءبىر پاسيەنتتىڭ مويىن ومىرتقاسىنا ليامينوپلاستيكا جاسالدى. بەل ومىرتقاسى زاقىمدانعان تاعى ءبىر پاسيەنتكە شاعىن ءينۆازيۆتى OLIF ادىسىمەن وپەراسيا جاسالدى. حيرۋرگيالىق مانيپۋلياسيالاردىڭ ءبارى ءمامس ەسەبىنەن جۇرگىزىلدى.
ليامينوپلاستيكا – ومىرتقا قىسىلىپ، جۇيكە تالشىقتارىنىڭ زاقىمدانۋىنا اكەپ سوقتىرعان ستەنوز اۋرۋىنا جاسالاتىن نەيروحيرۋرگيالىق وتانىڭ ءبىرى. ول قىسىلعان ومىرتقا كانالىن بوساتىپ، وتادان كەيىن بولاتىن اسقىنۋلاردىڭ الدىن الۋعا كومەكتەسەدى.
ال، OLIF پروسەدۋراسى وزگە وتا تۇرلەرىنە قاراعاندا ومىرلىك ماڭىزى بار اعزا قۇرىلىمدارىن زاقىمدانۋدان ساقتايدى.
مىسالى، 52 جاستاعى ناۋقاس 20 جىلدان استام ۋاقىتتان بەرى ومىرتقا جارىعىنىڭ اۋىر تۇرىمەن اۋىرادى. سوڭعى بىرنەشە ايدان بەرى اياقتارى جانسىزدانىپ، جاعدايى مۇلدە ناشارلاعان، سالدارىنان كۇندەلىكتى ءجۇرىپ-تۇرۋدىڭ ءوزى مۇڭ بولعانىن ايتادى. دارى-دارمەك پەن فيزيوتەراپيا ەشقانداي ناتيجە بەرمەگەن سوڭ حيرۋرگ مامانداردىڭ كومەگىنە جۇگىنىپتى.
«بۇل وپەراسيا ۇلتتىق نەيروحيرۋرگيا ورتالىعىنىڭ پروفەسسورى تالعات كەرىمبايەۆتىڭ جەتەكشىلىگىمەن ءوتتى. OLIF ءتاسىلى ءتيىمدى قولدانىلدى. بۇل ءبىزدىڭ اۋرۋحانادا جوعارى بىلىكتى ماماندار جۇمىس ىستەيتىنىن دالەلدەپ بەردى. وتا ناتيجەسىندە ناۋقاس ەركىن ءجۇرىپ-تۇرۋ مۇمكىندىگىنە يە بولدى. وپەراسيا تىندەردىڭ زاقىمدانۋىنا جول بەرمەيدى، بۇل اسىرەسە، ۇزاق ۋاقىت بويى سوزىلمالى دەرتپەن اۋىراتىن ناۋقاستار ءۇشىن وتە ماڭىزدى»، - دەدى جەتىنشى اۋرۋحانانىڭ №1 نەيروحيرۋرگيالىق بولىمشەسى مەڭگەرۋشىسى باقىت اعلاقوۆ.
ماماننىڭ ايتۋىنشا، OLIF ءادىسىنىڭ ارتىقشىلىقتارى كوپ. اتاپ ايتقاندا، شاعىن ءينۆازيۆتى وتادان كەيىن ناۋقاس دەنساۋلىعى قىسقا ۋاقىتتا قالپىنا كەلەدى؛ وتادان كەيىنگى اسقىنۋلار ءقاۋپى تومەندەيدى. ونىڭ ۇستىنە، پاسيەنتتەردىڭ كوبى وتا ورنىندا قالاتىن تىرتىققا كوپ ءمان بەرەدى، سوندىقتان شاعىن ءينۆازيۆتى ءتاسىل كوسمەتيكالىق جاعىنان دا ءتيىمدى بولىپ كەلەدى.
«OLIF پروسەدۋراسى حيرۋرگكە دەنەنىڭ الدىڭعى جانە قاپتال تۇسىنان جۇمىس ىستەپ، بەلومىرتقا قىزمەتىن قالپىنا كەلتىرۋگە مۇمكىندىك بەرەدى. بۇل ءادىس ناۋقاستارعا ءداستۇرلى وتاعا قاراعاندا تەز ارادا ساۋىعىپ، قالىپتى ومىرگە ارالاسۋعا مۇمكىندىك بەرەدى. ەڭ باستىسى، پاسيەنت كوپ قان جوعالتپايدى جانە ءتىن كوپ زاقىمدانبايدى»، - دەپ ءتۇسىندىردى دارىگەر.
ءساتتى جاسالعان وتانىڭ ارقاسىندا سىرقاتتىڭ نيەۆرولوگيالىق احۋالى جاقساردى، اياقتارىنىڭ سەزىمتالدىعى ارتىپ، اۋىرسىنۋ بەلگىلەرى تومەندەي باستادى. وپەراسيا ومىرتقانى تۇراقتاندىرىپ، اسقىنۋلاردىڭ الدىن الۋعا مۇمكىندىك بەردى. ناۋقاس وتادان كەيىن ەكىنشى كۇنى ءوز بەتىمەن جۇرە باستادى.