الماتى قالاسىنىڭ جۇقپالى اۋرۋلار اۋرۋحانالارىندا 6 مىڭنان استام ناۋقاس جاتىر، ونىڭ ىشىندە 169 - بالا.
بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا قوعامدىق دەنساۋلىق باسقارماسى باسشىسىنىڭ ورىنباسارى سۆەتلانا سۇلتانعازييەۆا ءمالىم ەتتى، دەپ حابارلايدى Almaty-akshamy.kz.
وتكەن تاۋلىكتە الماتىدا 1590 جاعداي ادام تىركەلدى، ولاردىڭ 1515ء-ى - سيمپتومدى تاسىمالداۋشىلار. بارلىعى 6،021 ادام اۋرۋحانالاردا، 476 ادام جان ساقتاۋ بولىمىندە ەمدەلۋدە، ال 35 ادام ءوجج اپپاراتىنا، 188 ءينۆازيۆتى ءوجج اپپاراتىنا، 223 ناۋقاس High Flow اپپاراتىنا قوسىلعان. قالاداعى كوۆيدتىك ستاسيونارلاردا توسەك-ورىن تاپشىلىعى جوق؛ بۇگىنگى كۇنگە دەيىن بارلىعى 8 910 توسەك-ورىن دايىندالدى.
س.سۇلتانعازييەۆا الماتىنىڭ دارىگەرلەرى ەكى ەسە جۇكتەمەمەن جۇمىس ىستەيتىنىن اتاپ ءوتتى.
«جەدەل جاردەم كولىگىنىڭ جۇكتەمەسى شارىقتاپ تۇر، تاۋلىگىنە 1600-گە جۋىق جاعداي تىركەلىپ، اۋرۋحاناعا جاتقىزۋ سانى 700-750 دەڭگەيدە، ءوسىم جوعارى. تاۋلىگىنە 3000-3500 دەيىن قوڭىراۋ شالىنادى. كۇن سايىن 2600-2750 قوڭىراۋ سوعىلادى»، - دەدى س. سۇلتانعازييەۆا.
ول 12 868 ناۋقاستىڭ امسك پەن تەلەمەديسينا ورتالىعىنىڭ ءموبيلدى توپتارىنىڭ باقىلاۋىندا ەكەنىن ايتتى.
بۇگىندە جۇزدەگەن دارىگەرلەر كوروناۆيرۋسپەن كۇرەسۋدە، ولاردىڭ كەيبىرەۋلەرى الماتىداعى ۆاكسينالاۋ ورتالىقتارىندا جۇمىس ىستەيدى. 1000-نان استام دارىگەر ازاماتتارعا ەكپە جاسايدى.
ايتا كەتسەك، قالادا مەديسينالىق ۇيىمداردا، مەكتەپتەردە، مادەنيەت جانە سپورت نىساندارىندا، بازارلار مەن ساۋدا ورتالىقتارىندا ورنالاسقان 160 ۆاكسينالاۋ پۋنكتى بار.
وتكەن تاۋلىكتە الماتىدا ءبىرىنشى كومپونەنتپەن 3585 ادام، ەكىنشىسىمەن - 7 729 ادام ۆاكسينالاندى. 2021 جىلدىڭ 1 اقپانىنان 24 تامىزىنا دەيىنگى بارلىق كەزەڭ بويىنشا 849 542 ادام ءبىرىنشى كومپونەنتپەن، 691 848 ادام ەكىنشى كومپونەنتپەن ەگىلدى. ەگىلگەندەردىڭ جالپى سانىنىڭ 110 236-ىن 60 جاستان اسقان قاريالار قۇرايدى.
سۆەتلانا سۇلتانعازييەۆا الماتىلىقتاردى كۇزگى-قىسقى ماۋسىمدىق ۆيرۋستار كەزەڭى جاقىنداعاندىقتان، جۋىق ارادا ۆاكسينالانۋعا شاقىردى.
«ەندى جرۆي جانە تۇماۋ سياقتى ماۋسىمدىق اۋرۋلار باستالادى. تەمپەراتۋرا كوتەرىلگەندە جانە دەرت جۇقتىرعان جاعدايدا اۋرۋ ءورشي تۇسەدى. سوندىقتان قازىردەن باستاپ كوروناۆيرۋسقا قارسى ۆاكسينالانۋ قاجەت»، - دەدى قدب باسشىسىنىڭ ورىنباسارى.