قۇتقارۋ قىزمەتى جۇمىس جاساپ جاتىر.
داۋىلدى ەسكەرتۋ مەن قولايسىز اۋا رايى جاعدايىنا - ەكپىندى جەل، جاۋىن-شاشىن مەن سۋلى قاردىڭ بولۋىنا بايلانىستى قالا اۋماعىندا اعاشتار مەن بۇتاقتاردىڭ قۇلاۋ فاكتىلەرى تىركەلدى، دەپ حابارلايدى Almaty-akshamy.kz.
سالدارىن جويۋ جۇمىستارىن اۋداندىق اكىمدىكتەردىڭ مەردىگەر ۇيىمدارى مەن الماتى قالاسىنىڭ قۇتقارۋ قىزمەتى جۇزەگە اسىرىپ جاتىر.
29 ناۋرىز كۇنگى ساعات 19:00-دەگى جاعداي بويىنشا، «112» جەلىسىنە اعاش قۇلاۋعا قاتىستى 36 قوڭىراۋ كەلىپ تۇسكەن. 31 اعاش، 5 ۇلكەن بۇتا قۇلاعان، ونىڭ ىشىندە 21 اعاش كولىكتەرگە قۇلاعان.
پۋلتتىك مونيتورينگ قىزمەتىنىڭ اقپاراتىنا سايكەس، بۇتاقتىڭ سىنىپ تۇسۋىنەن 1 ەرەسەك ادام بولماشى دەنە جاراقاتىن العان.
بارلىق تىركەلگەن جاعداي بويىنشا اۋداندىق توتەنشە جاعداي بولىمدەرى، اۋداندىق اكىمدىكتەردىڭ مەردىگەر ۇيىمدارى مەن الماتى قالاسىنىڭ قۇتقارۋ قىزمەتى جۇمىس جاساپ جاتىر.
جاسىل ەكونوميكا باسقارماسىنىڭ اقپاراتىنا سايكەس، الماتىدا 2،8 ملن اعاش بولسا، ونىڭ 84،6 مىڭى - اپات جاعدايىندا.
جۇرگىزىلگەن ساراپتاماعا سايكەس، نەگىزىنەن، اپاتتى جاعدايداعى اعاشتار قالانىڭ ورتالىق جانە شەتكەرى ايماقتارىندا ورنالاسقان. ونىڭ ىشىندە ماقساتتى (كوشە بويىندا) - 34962 اعاش، جالپى قولدانىستاعى (اۋلا ىشىندە) - 49666 اعاش بار.
اۋدان اكىمدىكتەرىنىڭ اپپاراتتارى مەن جاسىل ەكونوميكا باسقارماسى بىرلەسە وتىرىپ، اپاتتى جاعدايداعى اعاشتاردى كەسىپ، ورنىنا جاس اعاشتار وتىرعىزىپ، قالانىڭ جاسىل قورىن قالپىنا كەلتىرۋ جۇمىستارىن جۇرگىزىپ كەلەدى.