16 قۇتقارۋشى، 4 ارنايى تەحنيكا كۇن-تۇن دەمەي جۇمىس ىستەيدى.
الماتى ماڭىندا قار كوشكىنى بولۋى مۇمكىن دەگەن ءقاۋىپتى 165 اۋماق بار. سونىڭ بىرىندە 17 ناۋرىز كۇنى 30 مىڭ شارشى مەتر بولاتىن قار كوشكىنى بولعان ەدى. ماماندار بۇل اۋماقتاردىڭ بارلىعى دەرلىك ءجىتى باقىلاۋدا ەكەنىن ايتادى. الايدا اپات ايتىپ كەلمەيدى، الدىن الۋ شارالارى ءجيى جاسالۋى ءتيىس دەگەندى العا تارتادى، دەپ حابارلايدى Almaty-akshamy.kz Almaty.tv سىلتەمە جاساپ.
ايىنا شامامەن 200 مىڭعا جۋىق كەلۋشىنى قابىلدايتىن «شىمبۇلاق» تاۋ-شاڭعى كۋرورتى كوشكىن ءقاۋپى بار اۋماققا جاتاتىندىقتان، مۇندا ساقتىق شارالارى قاتاڭ ساقتالادى دەيدى ماماندار. ول ءۇشىن تىڭ تەحنيكا مەن تازارتقىش قۇرالدارى پايدالانىلادى ەكەن.
قالا جۇرتشىلىعىنىڭ قاۋىپسىزدىگىن قامتاماسىز ەتىپ، قار كوشكىنىنىڭ الدىن الۋ ءۇشىن 2860 مەتر بيىكتىكتە 16 قۇتقارۋشى، 4 ارنايى تەحنيكا كۇن-تۇن دەمەي جۇمىس ىستەيدى.
قۇتقارۋ قىزمەتكەرلەرى ەرەجە بۇزاتىن ەل-جۇرتتىڭ دا بارشىلىق ەكەنىن جاسىرمادى. ولار شاڭعى تەبەتىن ارنايى اۋماقتان اسىپ، قورشاۋدى بۇزىپ بارىپ سىرعانايدى دەيدى. بۇل ءوز كەزەگىندە قاردىڭ وپىرىلۋىنا ىقپال ەتەتىنىن جەتكىزدى.
قار كوشكىنى ءقاۋپى ءالى دە بار دەگەن قالالىق «قازسەلدەنقورعاۋ» ماماندارى 82 مىڭ شارشى مەتر بولاتىن اۋماقتى ءقازىر باقىلاۋعا الدىق دەيدى. ولاردىڭ ايتۋىنشا، الماتىداعى ۇلكەن جانە كىشى الماتى شاتقالدارىندا 165 ءقاۋىپتى جەر بار ەكەن.