الماتىدا «ءداستۇرلى اۋەن» مۋزىكا فەستيۆالى وتەدى

الماتى قالاسى قوعامدىق دامۋ باسقارماسىنىڭ قوعامدىق دامۋ ورتالىعىنىڭ ۇيىمداستىرۋىمەن اشىق اسپان استىندا «ءداستۇرلى اۋەن» مۋزىكا فەستيۆالى وتكىزىلەدى.

فەستيۆالدىڭ ماقساتى: مادەني مۇراعا اينالعان قازاق اۋەندەرىن تانىمال ەتۋگە، ەلگە دەگەن سۇيىسپەنشىلىك، ماقتانىش جانە قۇرمەت سەزىمىن تاربيەلەۋگە ىقپال ەتۋ.

بۇل جوبانى ىسكە اسىرۋ - وسكەلەڭ ۇرپاققا قازاق جەرىنىڭ باي مادەني يگىلىگىمەن جاقىنىراق بايلانىستا بولۋعا، ورىنداۋشىلار مەن فولكلورلىق ۇجىمداردىڭ حالىق اندەرى مەن اۋەندەرىن ورىنداۋ ارقىلى قازاق حالىق اسپاپتارىنىڭ (دومبىرا، قوبىز، شەرتەر، جەتىگەن) دىبىستالۋىنان ءلاززات الۋعا مۇمكىندىك بەرەدى.

فەستيۆالگە قۇرمانعازى اتىنداعى قازاق مەملەكەتتىك ۇلتتىق اسپاپتار ءانسامبلى، ىرىكتەۋدەن وتكەن بالالار ونەر انسامبلدەرى جانە جەكە ورىنداۋشىلار قاتىسىپ، 3 بولىمدە ونەر كورسەتەدى:

- بالالار مۋزىكالىق انسامبلدەرى، جەكە ورىنداۋشىلار؛

- جاسوسپىرىمدەر انسامبلدەرى، جەكە ورىنداۋشىلار؛

- اعا بۋىن ونەرپازدارى. حالىقارالىق كونكۋرستاردىڭ لاۋرەاتتارى، قازاقستان رەسپۋبليكاسىنىڭ مادەنيەت جانە ونەر قايراتكەرلەرى، شىعارماشىلىق انسامبلدەر مەن فولكلورلىق ۇجىمدار.

فەستيۆال بارىسىندا ۇلتتىق اسپاپتارىمىزدىڭ قوڭىر ءۇنى ەستىلىپ، ۇرپاقتار ساباقتاستىعىمەن جالعاسىپ كەلە جاتقان دارا تۇلعالار قۇرمانعازى، تۇركەش، نۇرعيسانىڭ كۇيلەرى، مۇحيت، كەنەن، مولدابايدىڭ اندەرى ورىندالىپ، تىڭدارمان قاۋىمنىڭ جۇرەگىنە ەرەكشە كوڭىل-كۇي سىيلايتىن ءداستۇرلى اۋەندەر شىرقالماق.

وتكىزىلۋ ورنى: ورتالىق مادەنيەت جانە دەمالىس ساياباعى.

وتكىزىلۋ ۋاقىتى: 27-قىركۇيەك- 2023 جىل. ساعات 16:00-دە