وڭىرلىك كوممۋنيكاسيالار قىزمەتىنىڭ بريفينگىندە ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى ارمان راحيموۆ الماتىدا سىبايلاس جەمقورلىق تاۋەكەلدەرىنىڭ كارتاسىن ىسكە اسىرۋ تۋرالى ايتتى.
سىبايلاس جەمقورلىق تاۋەكەلدەرىنىڭ الدىن الۋ ءۇشىن كارتادا كورسەتىلگەن سەگىز نەگىزگى سالا انىقتالدى، ولار: قۇرىلىس جانە تۇرعىن ءۇي، ەكولوگيا، جەر، بيزنەس، ەكونوميكا جانە قارجى، فيسكالدىق، الەۋمەتتىك، ينفراقۇرىلىم جانە جولدار، دەپ حابارلايدى Almaty-akshamy.kz.
«وڭىرلىك پروبلەمالارعا تەرەڭ ۇڭىلە وتىرىپ جانە ءاربىر ءوڭىردىڭ ەرەكشەلىگىن ەسكەرە وتىرىپ، اگەنتتىك وبلىس پەن رەسپۋبليكالىق ماڭىزى بار قالالار ءۇشىن سىبايلاس جەمقورلىق تاۋەكەلدەرىنىڭ كارتاسىن ازىرلەدى. كارتادا پروسەستەردىڭ اشىقتىعىنا، اكىمشىلىك كەدەرگىلەردىڭ بولۋىنا، زاڭنامانىڭ جەتىلمەگەندىگىنە بايلانىستى شەشىمىن تابۋ مۇمكىن ەمەس وزەكتى ماسەلەلەردىڭ تىزبەسى ۇسىنىلعان»، - دەدى ا. راحيموۆ.
ونى ىسكە اسىرۋ شەڭبەرىندە اعىمداعى جىلى سىبايلاس جەمقورلىققا قارسى 8 مونيتورينگ جانە سىبايلاس جەمقورلىق تاۋەكەلدەرىنە 3 سىرتقى تالداۋ جۇرگىزىلدى، ونىڭ قورىتىندىسى بويىنشا 129 ۇسىنىس ەنگىزىلدى، 24 تۇلعا جاۋاپكەرشىلىككە تارتىلدى.
سپيكەردىڭ ايتۋىنشا، مەملەكەتتىك ورگاننىڭ ەرەكشە باقىلاۋىندا بيزنەس سالاسى بار. ايتا كەتەيىك، الماتىدا 350 مىڭعا جۋىق شاعىن جانە ورتا كاسىپكەرلىك سۋبەكتىلەرى تىركەلگەن.
«كاسىپكەرلەرگە كومەك كورسەتۋ ماقساتىندا «بيزنەس جول» جوباسى اياسىندا ەكى مىڭنان استام كاسىپكەردى قامتي وتىرىپ، الپىس بەس كەزدەسۋ وتكىزىلدى، پروبلەمالىق ماسەلەلەردىڭ جيىرما التى كەيسى شەشىلدى، التى ءجۇز كاسىپكەردىڭ قۇقىقتارى قورعالدى»، - دەپ ءبولىستى ول.
وسىلايشا، كاسىپكەرلىك قىزمەتكە ارالاسقانى ءۇشىن 3 لاۋازىمدى تۇلعا اكىمشىلىك جاۋاپكەرشىلىككە تارتىلدى. 7 فاكت بويىنشا اقبتك-نىڭ 465-بابى بويىنشا رۇقسات بەرۋ ءتارتىبى مەن مەرزىمىن بۇزعانى ءۇشىن 4 ادام جاۋاپقا تارتىلدى. بۇدان باسقا، 9،2 ملرد تەڭگە وتەلدى جانە 5،4 ملرد تەڭگە بۇعاتتالدى.
سىبايلاس جەمقورلىققا قارسى ءىس-قيمىلعا باعىتتالعان شارالاردان باسقا، نەگىزگى نازار سىبايلاس جەمقورلىق تاۋەكەلدەرىنىڭ الدىن الۋعا باعىتتالعان. ماسەلەن، اگەنتتىك «سىبايلاس جەمقورلىققا قارسى ۆولونتەرلىك» جوباسىن ىسكە قوستى، ونىڭ ماقساتى ەرىكتىلەر رەتىندە سىبايلاس جەمقورلىققا قارسى قىزمەتكە بەي-جاي قارامايتىن ازاماتتاردى تارتۋ بولىپ تابىلادى.
«الماتى قالاسى بويىنشا 100-دەن استام ازامات سىبايلاس جەمقورلىققا توزبەۋشىلىكتى دامىتۋ، ونىڭ الدىن الۋ پايداسىنا سىبايلاس جەمقورلىققا قارسى قىزمەتكە بەلسەندى قاتىسۋعا نيەت ءبىلدىردى. سىبايلاس جەمقورلىققا توزبەۋشىلىك بويىنشا قوعامنىڭ ساناسىن وزگەرتەتىن الدىن الۋ جۇمىستارىنىڭ وڭ ناتيجەسى بارىن اتاپ وتۋگە بولادى. بۇرىن حالىق ولاردان پارا الۋ فاكتىلەرى تۋرالى ءجيى جۇگىنەتىن بولسا، ەندى مەملەكەتتىك قىزمەتشىلەردىڭ وزدەرى ولارعا ۇسىنىلاتىن سىياقىلار تۋرالى بەلگى بەرەدى»، - دەپ ءبولىستى ا. راحيموۆ.
وتكەن جىلى سىبايلاس جەمقورلىق قۇقىق بۇزۋشىلىقتار تۋرالى حابارلاعانى ءۇشىن 2.6 ملن تەڭگە سوماسىنا 13 ازاماتتىڭ ەڭبەگى قارجىلاي باعالاندى. اعىمداعى جىلى 520 مىڭ تەڭگە سوماسىنا 3 تۇلعا.