ءورت اۋماعى 80 پايىز ازايعان
قىزىل جالىننىڭ تۇتانۋىنا تۇرعىنداردىڭ وتتى ءجونسىز قولدانۋى سەبەپ بولادى. شىلدەنىڭ شىلىڭگىر ىستىعىندا لاپ ەتۋ ىقتيمالدىلىعى جوعارلايتىن دالا ءورتى بيىل 50 پايىزعا ازايعان. بۇل تۋرالى الماتى قالاسىنىڭ توتەنشە جاعدايلار دەپارتامەنتى ءمالىم ەتتى، دەپ حابارلايدى، Almaty-akshamy.kz Almaty.tv-گە سىلتەمە جاساپ.
توتەنشەلىكتەر دەرەگىنشە، جىل باسىنان بەرى قۋراعان وسىمدىك باسقان اۋماقتاردا جالپى 77 رەت ءورت بولعان. قىزىل جالىن شاشامەن 2،5 گەكتاردان اساتىن الاڭعا تاراپتى. الايدا توتەنشەلىكتەر، وتكەن جىلمەن سالىستىرعاندا، بيىل دالا ءورتىنىڭ ازايعانىن ايتىپ وتىر.
«وتكەن جىلمەن سالىستىرعاندا ءورت وقيعاسى 50 پايىزعا تومەندەدى. سايكەسىنشە، ءورت اۋماعى 80 پايىز ازايعان. بۇل – اۋداندىق اكىمدىكتەرمەن بىرلەسە ىستەگەن شارالار ناتيجەسى»، – دەدى تجد اعا ينجەنەرى ءابدىيسلام ءابدىقادىروۆ.
قىزىل جالىننىڭ تۇتانۋ فاكتىسى القاپتان بولەك، تۇرعىن ۇيلەردە دە تومەندەگەن دەيدى توتەنشەلىكتەر. ماسەلەن، بىلتىرمەن سالىستىرعاندا 16 پايىزعا ازايعان. ءبىرىنشى جارتىجىلدىقتا 312 ءورت جاعدايى تىركەلگەن.
«تجد بيىل 110 شاقىرتۋ ءتۇستى. ونىڭ ىشىندە 27 ءورت وقيعاسى ورىن العان. وتكەن جىلمەن سالىستىرعاندا 18 پايىزعا كەم»، – دەدى اۋەزوۆ اۋداندىق تجب باس مامانى راۋان داۋرەن ۇلى.
ال الماتىنىڭ اۋەزوۆ اۋدانىنىنىڭ ءورت سوندىرۋشىلەرى كوبىنە تۇرعىن ۇيلەرگە شاقىرتۋ تۇسەتىنىن ايتادى. سوندىقتان مۇندا كولىكتەن بولەك، 54 مەترگە دەيىن كوتەرىلەتىن كران جانە كەپتەلىس كەزىندە ۋاقىت ۇنەمدەۋ ءۇشىن موتوسيكلدەر دە قولدانىلادى ەكەن.
ءورت سوندىرۋشىلەر دەرەگىنشە، قىزىل جالىننىڭ تۇتانۋىنا كوبىنە تۇرعىنداردىڭ قوقىس تاستاپ كەتۋى، وتتى ءجونسىز قولدانۋى سەبەپ بولادى. بۇعان دەيىن تجد وكىلدەرى تابيعات اياسىندا جابدىقتالماعان جەردە كۋاپ ءپىسىرىپ، اس دايىنداعاندارعا قوماقتى ايىپپۇل سالىناتىنىن ايتقان.