ەۋروپادا اپتاپ ىستىق باسىلماي تۇر

ۇلىبريتانيادا تاريحتاعى ەڭ ىستىق كۇن ورىن الدى

ەۋروپا مەملەكەتتەرىندە بۇرىن-سوڭدى بولماعان اپتاپ ىستىق ورىن الۋدا. BBC News مالىمەتى بويىنشا قارت قۇرلىقتا اۋا تەمپەراتۋراسى 40 گرادۋستان اسىپ كەتتى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
اۋا رايىنىڭ مۇنداي قاتتى ىستىعى سالدارىنان ورماندار ورتەنىپ، جەرگىلىكتى تۇرعىندار ەۆاكۋاسيالانىپ، ءورت سوندىرۋشىلەر، دارىگەرلەر مەن قۇتقارۋشىلار دەمالىسسىز جۇمىس ىستەپ جاتىر.
ۇلىبريتانيادا كەشە تاريحتاعى ەڭ ىستىق كۇن ورىن العان. بۇل جەردە سىناپ باعاناسى العاش رەت 40 گرادۋستان ارتىق ىستىقتى كورسەتتى. ادامدارعا مۇمكىندىگىنشە كوشەگە شىقپاۋ جانە كولىك قۇرالدارىن قولدانباۋ ەسكەرتىلدى. لوندون مەن ونىڭ ماڭايىندا ىستىقتان شوپتەر ورتەنگەن. 
فرانسيادا ءتىلسىز جاۋ ورمان القاپتارىن جويىپ، مىڭداعان ادامدى ەۆاكۋاسيالاۋعا تۋرا كەلگەن. كورشى شۆەيساريادا قاتتى ىستىقتان لاك-برەنەت كولى قۇرعاپ قالدى. 
گەرمانيادا دا اۋا تەمپەراتۋراسى +40 گرادۋستان اسىپ كەتتى. يتاليادا سوڭعى 70 جىلدا بولماعان قۇرعاقشىلىق پەن ورمان ورتتەرى ورىن الدى. بىرنەشە وڭىردە توتەنشە جاعداي جاريالاندى. 
ۆەنگريانىڭ ىستىعى ءالى باسىلار ەمەس. تەمپەراتۋرا بۇل ەلدە دە +40 گرادۋستان استى. گرەكيادا ورمان ءورتى افيناعا جاقىنداپ كەلەدى. 
پورتۋگاليادا ورمان ورتىنەن 40 مىڭ گەكتار جەر ورتەنىپ كەتكەن. پورتۋگاليادا تەمپەراتۋرالىق رەكورد بيىل +47 گرادۋستى كورسەتتى.