سەربيانىڭ ءبىرىنشى حانىمى تامارا ۆۋچيچ الماتىدا «سەرب ايەلى: عاسىرلار توعىسىندا» اتتى كورمەنىن سالتاناتتى اشىلۋىنا قاتىستى. بەلگراد قالاسى مۋزەيىنىڭ قورىنان الىنعان 100-دەن استام جادىگەردەن تۇراتىن ەكسپوزيسيا قازاقستاندا العاش رەت ۇسىنىلىپ وتىر. قوعامداعى ايەل مارتەبەسىن دارىپتەيتىن بۇل كورمە سەربيا تاريحى مەن مادەنيەتىنىڭ بىرەگەي مۇراسىمەن تانىستىرادى.
اشىلۋ سالتاناتىنا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا، ديپلوماتيالىق كورپۋس، ەلشىلىك وكىلدەرى جانە مادەنيەت قايراتكەرلەرى قاتىستى.
«تاريح بىزگە ايەل – ءومىردىڭ باستاۋى ەكەنىن ۇيرەتەدى. سەرب ايەلدەرى بيلىك جۇرگىزىپ، ديپلوماتيالىق قارىم-قاتىناس ورناتىپ، جاۋىنگەر رەتىندە ەل يگىلىگىنە قىزمەتتە دە الدىڭعى قاتاردا بولدى. وسى كورمەنىڭ وتۋىنە ۇلەس قوسقان بارشاڭىزعا شەكسىز العىس بىلدىرەمىن»، – دەدى تامارا ۆۋچيچ.
ەكسپوزيسيا 7،5 مىڭ جىلعا جۋىق تاريحي كەزەڭدى قامتيدى. كورمەدە ارحەولوگيالىق ارتەفاكتىلەر، ەتنوگرافيالىق جادىگەرلەر، ساندىك-قولدانبالى ونەر تۋىندىلارى جانە XIX عاسىرداعى كورنەكتى سەرب ايەلدەرىنىڭ پورترەتتەرى ۇسىنىلعان.
مينيستر ايدا بالايەۆا قازاق قوعامىندا ايەل – وتباسى قۇندىلىقتارىنىڭ ساقتاۋشىسى، دانالىق پەن رۋحاني كۇشتىڭ سيمۆولى ەكەنىن اتاپ ءوتتى. ءتۇرلى تاريحي كەزەڭدەردە وتباسىن، ەلىن قورعاۋعا بەل بۋعان باتىر انالار مەن قىزدار جايلى تاعزىممەن ەسكە الاتىنىمىزدى ايتتى. بۇل تۇسىنىك سەرب مادەنيەتىنە دە جاقىن ەكەنىن، كورمەدەن ايقىن اڭعارىلاتىنىن جەتكىزدى.
«بۇگىندە سەربيا مەن قازاقستان اراسىنداعى بايلانىس رەسمي كەلىسىمدەرمەن عانا شەكتەلمەيدى. ولار مادەنيەت، ءبىلىم جانە ونەر سالالارىنداعى بىرلەسكەن جوبالار ارقىلى جالعاسۋدا. سوڭعى جىلدارى مادەني-گۋمانيتارلىق سالاداعى ىنتىماقتاستىق ايرىقشا بەلسەندى بولا ءتۇستى. بۇل ەكى ەل اراسىنداعى ءوزارا قۇرمەت پەن دوستىقتىڭ ايقىن بەلگىسى»، – دەدى مينيستر.
بۇل حالىقارالىق جوبا الماتى مەن بەلگراد اراسىنداعى مۋزەيارالىق ىنتىماقتاستىقتىڭ جالعاسى رەتىندە ۇيىمداستىرىلىپ وتىر. 2024 جىلى جەلتوقسان ايىندا بەلگراد قالاسىندا حانشايىم ليۋبيسا سارايىندا الماتى مۋزەيىنىڭ «ۇلى دالانىڭ مادەني مۇراسى» حالىقارالىق كورمەسى جوعارى دەڭگەيدە وتكىزىلدى.
«سەرب ايەلى: عاسىرلار توعىسىندا» كورمەسىن 2025 جىلى 15 قاراشاعا دەيىن الماتى مۋزەيىندە تاماشالاۋعا بولادى. مەكەنجايى: الماتى قالاسى، قابانباي باتىر كوشەسى، 132.