الماتى قالاسىنىڭ اكىمى دارحان ساتىبالدى مەگاپوليستەگى ءبىرقاتار الەۋمەتتىك جانە ينفراقۇرىلىمدىق نىساندۆ ارالاپ، تۇرعىنداردىڭ وتىنىشتەرىمەن، اباتتاندىرۋ جۇمىستارىنىڭ ناتيجەلەرىمەن جانە الەۋمەتتىك مەكەمەلەردەگى جاعدايمەن تانىستى.
جۇمىس ساپارى بوستاندىق اۋدانىنداعى Rams City تۇرعىن ءۇي كەشەنىنەن باستالدى. مۇندا اكىم تۇرعىنداردىڭ ءوتىنىشىن تىڭدادى. اسىرەسە، ەسكى ۇيلەردە تۇراتىن ازاماتتار كوشۋ ماسەلەسىن كوتەردى. دارحان ساتىبالدى بۇل ماسەلەنى جەكە باقىلاۋىنا الاتىنىن جانە جاۋاپتى ورگاندارمەن بىرلەسىپ قاراستىرىلاتىنىن اتاپ ءوتتى.
Rams City تۇرعىن ءۇي كەشەنىنىڭ تۇرعىندارى دا ءبىرقاتار ماسەلەنى ايتتى. ولار گيدرووقشاۋلاۋ، جول قوزعالىسىن ۇيىمداستىرۋ جانە پوليسيا پۋنكتىن ورناتۋ. اكىم وسى باعىتتار بويىنشا ءتيىستى قىزمەتتەرگە ناقتى شارالار قابىلداۋدى جانە جاعدايدى تۇراقتى باقىلاۋدا ۇستاۋدى تاپسىردى.
كەيىن دارحان ساتىبالدى بوستاندىق اۋدانىنداعى تورايعىروۆ كوشەسىنىڭ بويىنداعى اباتتاندىرىلعان جۇرگىنشىلەر ايماعىمەن تانىستى. بۇل جوبا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلعان. اباتتاندىرىلعان اۋماقتىڭ جالپى كولەمى – 2،5 گەكتار.
قايتا جوندەۋ بارىسىندا تروتۋارلار تولىق جاڭارتىلىپ، جيەكتاستار ورناتىلدى، مۇمكىندىگى شەكتەۋلى ازاماتتار ءۇشىن قولجەتىمدى ورتا قامتاماسىز ەتىلدى. ۆەلوجولى قالپىنا كەلتىرىلىپ، جارىقتاندىرۋ جۇيەسى جاڭعىرتىلدى. ەنەرگيا ۇنەمدەيتىن شامدارمەن جابدىقتالعان جاڭا شام تىرەكتەرى ورناتىلىپ، بۇل تۇنگى ۋاقىتتا قاۋىپسىزدىك دەڭگەيىن ارتتىردى. سونداي-اق زاماناۋي بالالار جانە سپورت الاڭدارى سالىندى، ءقاۋىپسىز جابىن توسەلدى، 200-دەن استام اعاش پەن 1 500 بۇتا ەگىلدى، اۆتوماتتى سۋارۋ جۇيەسى ورناتىلدى.
جۇمىس ساپارىنىڭ سوڭىندا دارحان ساتىبالدى اۋەزوۆ اۋدانىنداعى «پاراسات» جانە «شاڭىراق» الەۋمەتتىك قىزمەت كورسەتۋ ورتالىقتارىنا باردى.
«پاراسات» ورتالىعى 2005 جىلى قۇرىلعان جانە پسيحونيەۆرولوگيالىق اۋرۋلارى بار بالالار مەن ەرەسەكتەرگە ارناۋلى الەۋمەتتىك قىزمەت كورسەتەدى. 2025 جىلى جۇرگىزىلگەن كۇردەلى جوندەۋدەن كەيىن مۇندا وڭالتۋ، دەلفينوتەراپيا، يپپوتەراپيا، شىعارماشىلىق شەبەرلىك جانە VR-تەراپيا كابينەتتەرى اشىلدى. ورتالىق 360 ادامعا قىزمەت كورسەتۋگە ارنالعان، مۇندا 132 قىزمەتكەر ەڭبەك ەتەدى.
– ءبىز ەرەكشە قاجەتتىلىگى بار ءار ازامات وزىنە قامقورلىق پەن قولداۋدى سەزىنەتىن جاعداي جاساۋىمىز كەرەك. مۇنداي ورتالىقتار ادامدارعا بەيىمدەلۋگە، كاسىبي كومەك الۋعا جانە تولىققاندى ءومىر سۇرۋگە مۇمكىندىك بەرەدى، – دەدى دارحان ساتىبالدى.
«شاڭىراق» ورتالىعى 2001 جىلدان بەرى جۇمىس ىستەيدى جانە ەگدە جاستاعى ازاماتتار مەن I-II توپتاعى مۇگەدەكتىگى بار ادامدارعا ارنالعان ستاسيونارلىق مەكەمە بولىپ تابىلادى. قازىرگى ۋاقىتتا مۇندا 292 ادام تۇرادى، ولاردىڭ 108ء-ى – مۇگەدەكتىگى بار ازاماتتار. ورتالىقتا مەديسينالىق، پسيحولوگيالىق جانە مادەني قىزمەتتەر كورسەتىلەدى. كۇردەلى جوندەۋ جۇرگىزىلىپ، اۋماق اباتتاندىرىلدى، بەينەباقىلاۋ ورناتىلدى جانە تۇزدى بولمە اشىلدى.
ساپار قورىتىندىسىندا قالا اكىمى الماتىنىڭ قالالىق ينفراقۇرىلىمىن دامىتۋ، اۋدانداردى اباتتاندىرۋ جانە تۇرعىندارعا كورسەتىلەتىن الەۋمەتتىك قىزمەتتەردىڭ ساپاسىن ارتتىرۋ باعىتىنداعى جۇيەلى جۇمىستى جالعاستىرۋدى تاپسىردى.