الماتىنىڭ 2025 جىلعا ارنالعان بيۋدجەتى 2022 جىلدىڭ باسىنداعى بيۋدجەتىنەن 2 ەسە كوپ
2023 جىلى الماتى ەكونوميكاسىنىڭ رەكوردتىق ءوسىمى جانە جوعارى بازا قالىپتاسۋى اياسىندا قالا ەكونوميكاسىنىڭ قارقىندى دامۋى جالعاسۋدا. بۇل تۋرالى الماتى اكىمى ەربولات دوسايەۆ 2025-2027 جىلدارعا ارنالعان بيۋدجەت بەكىتىلگەن ءماسليحاتتىڭ كەزەكتەن تىس سەسسياسىندا مالىمدەدى، دەپ حابارلايدى aqshamnews.kz
«2024 جىلدىڭ 10 ايىندا الماتىنىڭ قىسقا مەرزىمدى ەكونوميكالىق ينديكاتورى 5،2%-عا دەيىن جەدەلدەدى. بۇل ىسكەرلىك جانە ينۆەستيسيالىق بەلسەندىلىكتىڭ جوعارى دەڭگەيىمەن بىرگە جۇرەدى. نەگىزگى كاپيتالعا سالىنعان ينۆەستيسيا 8،2%-عا ءوسىپ، 1،3 ترلن تەڭگەگە جەتتى. بيىلعى جىلدىڭ ءبىرىنشى جارتىجىلدىعىندا 3،8 ملرد اقش دوللارى كولەمىندە تىكەلەي شەتەلدىك ينۆەستيسيا تارتىلدى»، – دەدى قالا باسشىسى.
اكىمنىڭ ايتۋىنشا، الماتى ەكونوميكاسىنىڭ قارقىندى دامۋى قالا كىرىستەرىنىڭ وسۋىنە مۇمكىندىك بەردى. 2024 جىلدىڭ 11 ايىندا الماتى بيۋدجەتىنە 1 650 ملرد تەڭگە اۋدارىلدى، بۇل وتكەن جىلمەن سالىستىرعاندا 25،8%-عا ارتىق.
«ءبىزدىڭ بولجامعا سايكەس، 2024 جىلى الماتى ەكونوميكاسىنىڭ ءوسىمى 5،5% دەڭگەيىندە بولادى دەپ كۇتىلۋدە. ال 2025 جىلى بۇل كورسەتكىش 6،4%-عا دەيىن جەدەلدەمەك»، – دەدى الماتى اكىمى.
ەكونوميكانىڭ تۇراقتى ءوسۋى اياسىندا جەرگىلىكتى بيۋدجەتتىڭ كىرىستەرى دە ارتىپ كەلەدى. بۇگىندە بيۋدجەتتىڭ 95%-ى قالانىڭ ءوز كىرىستەرىنەن قالىپتاسۋدا.
«2025 جىلعا ارنالعان الماتى بيۋدجەتى 2 ترلن 177 ملرد تەڭگە كولەمىندە جوسپارلانىپ وتىر. بۇل 2022 جىلدىڭ باسىنداعى 1 ترلن 70 ملرد تەڭگەدەن 2 ەسە كوپ»، – دەپ ءسوزىن قورىتىندىلادى ەربولات دوسايەۆ.
ايتا كەتەيىك، الماتى بيۋدجەتى الەۋمەتتىك باعىتىن ساقتاپ كەلەدى. الەۋمەتتىك سالاعا جۇمسالاتىن شىعىندار 15%-عا نەمەسە 110،6 ملرد تەڭگەگە ۇلعايىپ، 851،9 ملرد تەڭگەگە جەتتى، بۇل بيۋدجەت شىعىستارىنىڭ شامامەن 40%-ى.