الماتىدا 2025 جىلى ۇلكەن الماتى شاتقالىنىڭ ەڭ تانىمال نىساننىڭ ءبىرى – «الما-اراسان» رادون كوزىن قايتا جاڭارتۋ جوسپارلانۋدا. بۇل تۋرالى 2025-2027 جىلدارعا ارنالعان قالالىق بيۋدجەت قابىلدانعان الماتى ءماسليحاتىنىڭ سەسسياسىندا حابارلاندى.
ەمدىك قاسيەتتەرىمەن تانىمال بۇل رادون كوزى قازاقستاننان عانا ەمەس، شەتەلدەن دە تۋريستەر مەن قالا تۇرعىندارىن وزىنە تارتادى. الايدا جەرگىلىكتى تۇرعىندار مەن تۋريستەر تاراپىنان ينفراقۇرىلىمنىڭ قازىرگى جاعدايىنا بايلانىستى كەلىپ تۇسكەن كوپتەگەن شاعىمدار مەن ۇسىنىستار نەگىزىندە اۋقىمدى جاڭعىرتۋ جۇمىستارىن جۇرگىزۋ تۋرالى شەشىم قابىلداندى. سوڭعى جوندەۋ جۇمىستارى 2019 جىلى جۇرگىزىلگەن بولاتىن، سودان بەرى ينفراقۇرىلىم زاماناۋي قاۋىپسىزدىك جانە جايلىلىق ستاندارتتارىنا ساي بولۋ ءۇشىن جاڭارتۋدى قاجەت ەتەدى.
جوبادا ينفراقۇرىلىم نىساندارىن تولىق قايتا قۇرۋ كوزدەلگەن. باستى شارالاردىڭ قاتارىندا تايعاناققا قارسى ءقاۋىپسىز جابىندىسى بار جاڭا كوپىرلەر ورناتۋ، جولدار مەن جاياۋ جۇرگىنشى ايماقتارىن جاڭارتۋ قاراستىرىلعان. ەڭ ءقاۋىپتى ۋچاسكەلەردە تۇتقالارى بار باسپالداقتار ورناتىلىپ، زاقىمدانعان ەلەمەنتتەردى كۇشەيتۋ جانە اۋىستىرۋ جۇمىستارى جۇرگىزىلەدى. بۇدان بولەك، بارلىق ۋچاسكەنىڭ توسەمدەرى بولات تورمەن جاسالادى، بۇل جازدا دا، قىستا دا قاۋىپسىزدىكتى قامتاماسىز ەتەدى.
سونىمەن قاتار، جوبا تۋريستەردىڭ جەرگىلىكتى جەردە باعىت تابۋىنا جانە رادون كوزىنىڭ ەمدىك قاسيەتتەرىمەن تانىسۋىنا كومەكتەسەتىن جاڭا كورسەتكىشتەر مەن اقپاراتتىق ستەندتەردى ورناتۋدى قامتيدى.
جۇمىس اياقتالعاننان كەيىن «الما-اراسان» تەك ءقاۋىپسىز ءارى جايلى نىسانعا اينالىپ قانا قويماي، ەكولوگيالىق ءتۋريزمدى دامىتۋعا ىقپال ەتەتىن بىرەگەي تۋريستىك كورنەكى ورىنعا اينالادى دەپ كۇتىلۋدە.