الماتىدا تمد-داعى العاشقى بالالارعا ارنالعان عىلىم مۇراجايدىڭ قۇرىلىسى باستالادى
الماتىدا ءبىلىم بەرۋ سالاسىن قارجىلاندىرۋ كولەمى 2025 جىلعا قاراي 16% - عا ارتادى. بۇل تۋرالى الماتى اكىمى ەربولات دوسايەۆ قالالىق ءماسليحاتتىڭ 2025-2027 جىلدارعا ارنالعان بيۋدجەتى بەكىتىلگەن سەسسياسى بارىسىندا حابارلادى.
"2024 جىلى ءبىلىم بەرۋ سالاسىن قارجىلاندىرۋعا 479،3 ملرد تەڭگە ءبولىندى. 2025 جىلى قارجىلاندىرۋ كولەمى تاعى 16% - عا 555،4 ملرد تەڭگەگە دەيىن ۇلعايادى"، - دەپ اتاپ ءوتتى مەگاپوليس باسشىسى.
ونىڭ ايتۋىنشا، وقۋشى ورىندارىنىڭ تاپشىلىعىن تومەندەتۋ ماقساتىندا 2024 جىلى 11،8 مىڭ ورىنعا 9 مەكتەپ ىسكە قوسىلادى. 2025 جىلى "جايلى مەكتەپ" ۇلتتىق جوباسى اياسىندا 27،3 مىڭ ورىندىق تاعى 15 مەكتەپتىڭ قۇرىلىسى اياقتالادى.
مەملەكەت باسشىسىنىڭ قولداۋىنا وراي، 2025 جىلدان باستاپ الماتىدا بۇرىنعى "المالى" سو بازاسىندا بالالارعا ارنالعان تمد-داعى العاشقى عىلىم مۇراجايىن Science Museum Singapore-مەن بىرلەسىپ قۇرۋ باستالادى. وسى ماقساتتارعا قالا بيۋدجەتىنەن 12،2 ملرد تەڭگە ءبولۋ جوسپارلانۋدا. ايتا كەتەيىك، Singapore Science Museum-بۇل شىعارماشىلىق پروسەستىڭ عىلىم مەن ونەردەگى ءرولىن جانە ونىڭ قوعامنىڭ ساناسىنا اسەرىن زەرتتەۋگە باعىتتالعان الەمدەگى العاشقى مۇراجاي.
ەستەرىڭىزگە سالا كەتەيىك، جالپى الماتىدا جەرگىلىكتى بيۋدجەت ەسەبىنەن جاڭا مەكتەپتەر، قوسالقى نىساندار سالۋ ارقىلى وقۋشى ورىندارىنىڭ تاپشىلىعىنىڭ باسقارىلاتىن دەڭگەيىنە قول جەتكىزۋ بويىنشا بەلسەندى جۇمىس جۇرگىزىلۋدە. 2025 جىلى جايلى مەكتەپتەردى پايدالانۋعا بەرۋدى ەسكەرە وتىرىپ، وقۋشى ورىندارىنىڭ تاپشىلىعى باسقارىلاتىن دەڭگەيگە - 3-4 مىڭ ورىنعا دەيىن تومەندەيدى.