الماتىدا بۇگىن ناعىز فۋتبول مەرەكەسى! قازاقستان پرەمەر-ليگاسىنىڭ باستى قارسىلاستارى «قايرات» پەن «استانا» اراسىنداعى شەشۋشى ماچقا مىڭداعان جانكۇيەر جينالدى. ويىن الدىنداعى اتموسفەرانى كورگەندە، بۇل كۇندى الماتىلىقتار ءۇشىن تەك فۋتبول كەشى ەمەس، ناعىز وتباسىلىق مەيرام دەۋگە بولادى. ەرەكشە اتموسفەرا جايلى Aqshamnews.kz ءتىلشىسى تولىقتىرادى.
بۇگىنگى «قايرات» پەن «استانا» اراسىنداعى كەزدەسۋ قازاقستان فۋتبولىنىڭ ناعىز ەل-كلاسسيكوسى. ويىننىڭ تاعدىرى چەمپيوندىققا تىكەلەي اسەر ەتەتىندىكتەن، جانكۇيەرلەردىڭ قولداۋى ەرەكشە. ستاديون ماڭىندا كوتەرىڭكى كوڭىل كۇي، مۋزىكا مەن ۇراندار، بالالاردىڭ كۇلكىسى مەن قولىنداعى كوماندالىق جالاۋشالار ءبارى دە بۇل كەشتىڭ ەرەكشە ەكەنىن اڭعارتادى.
ماچتى تاماشالاۋعا كەلگەندەردىڭ اراسىندا الماتىلىق رامازان ەرمەكوۆ تە بار. ول ۇلىن ەرتىپ، سۇيىكتى كومانداسىنا جانكۇيەر بولۋعا كەلگەن.
«بۇگىنگى ويىن چەمپيوندىقتىڭ تاعدىرىن شەشەدى. قايراتتى قولدايمىز، جەڭىسكە جەتەدى دەپ سەنەمىن. اۋا رايى دا تاماشا، بارلىعى دا تارتىستى ويىننىڭ بولارىنا يشارا»، - دەيدى ول.
ال قاسكەلەڭنەن كەلگەن جانكۇيەر اليار ءوز قولداۋىن ەرەكشە ءبىلدىرىپتى. ونىڭ جەيدەسىنىڭ الدىنا «الماتى الەم استاناسى»، ال ارتىنا «قىزىم، سەن مەنىڭ سۇيىكتىمسىڭ» دەپ جازىلعان.
«بۇگىن ەكى ەل-كلاسسيكو بار: ءبىرى يسپانيادا، ءبىرى الماتىدا. ءوز قايراتىمنىڭ جەڭىسىنە سەنەمىن. ەسەپ 3:1، ارينە قايراتتىڭ پايداسىنا!» - دەيدى ول.
ويىنعا وتباسىمەن كەلگەندەردىڭ ءبىرى الماتىلىق ميراس. ول جارى مەن بالاسىمەن بىرگە ستاديونعا ەرتە كەلگەن.
«ءبىز ءۇشىن مۇنداي ماچتارعا بارۋ ءداستۇر. بۇل تەك فۋتبول ەمەس، وتباسىلىق دەمالىس، جاقسى كوڭىل كۇي. قايرات جەڭسە، بۇگىنگى كۇن ەكى ەسە قۋانىشقا اينالادى»، - دەيدى ول.
ستاديون اينالاسىنداعى شات-شادىمان كوڭىل كۇي مەن حالىقتىڭ ىقىلاسىن كورگەندە، فۋتبولدىڭ ەلدى بىرىكتىرەتىن قۋاتتى كۇش ەكەنىن سەزەسىڭ. الماتى بۇگىن تەك فۋتبولدى عانا ەمەس، بىرلىكتى، وتباسىلىق جىلىلىقتى جانە سپورت رۋحىن تويلاپ جاتىر.