قازاقستان پرەمەر-ليگاسىنىڭ باستى ويىنى — «قايرات» پەن «استانا» اراسىنداعى كەزدەسۋ تەك ەلىمىزدىڭ ەمەس، شەتەلدىك جانكۇيەرلەردىڭ دە نازارىن وزىنە اۋدارعان ايتۋلى وقيعاعا اينالدى.
26 قازان كۇنى الماتىنىڭ ورتالىق ستاديونىندا مىڭداعان كورەرمەن چەمپيوندىق التىن تاعدىرىن شەشەتىن تارتىستى ماچتى تاماشالاۋ ءۇشىن باس قوستى، - دەپ حابارلايدى Aqshamnews.kz.
ورتالىق ستاديون قاقپاسىنا العاشقىلاردىڭ ءبىرى بولىپ وسكەمەننەن كەلگەن 16 جاستاعى تيمۋر مەيرامعالييەۆ جەتتى. ول اتا-اناسى جانە ىنىلەرىمەن بىرگە ارنايى وسى ماچقا ات باسىن بۇرعان.
— بۇگىنگى ويىندى وتكىزىپ الۋ مۇمكىن ەمەس. ەلدىڭ ەڭ مىقتى ەكى كلۋبى كەزدەسەدى، بۇل ءبىزدىڭ ماقتانىشىمىز. اسىرەسە، ءوزىم قاتارلى ساتبايەۆتىڭ ويىنىن اسىعا كۇتىپ ءجۇرمىن. بۇكىل وتباسىمىزبەن «قايراتتى» قولدايمىز. مەن سەگىز جاسىمنان فۋتبول وينايمىن، ەندى ىنىلەرىم دە اينالىسا باستادى. اكەم دە بۇرىن ويناعان، فۋتبول ءبىزدىڭ وتباسىلىق ءداستۇرىمىز. فۋتبولعا ءبىر رەت عاشىق بولساڭ، ول ءومىر بويى جالعاسادى، — دەيدى تيمۋر كۇلىمسىرەپ.
جانكۇيەرلەر اراسىندا «قايراتتى» جاي عانا كوماندا ەمەس، ءومىرىنىڭ ءبىر بولشەگىنە اينالدىرعاندار دا بار. الماتىلىق دانيل كوركەشكو ءوز ەستەلىك ءبولىستى:
— «قايرات» مەنىڭ تۋعان كوماندام. بۇرىن ءوزىم دە وسى كلۋبتىڭ ساپىندا ويناعانمىن. بۇل جولى جەڭىس كۇتەمىن، ەڭ ازى 3:0 ەسەبىمەن اياقتالسىە. بيىل «قايرات» ءتىپتى «رەالمەن» كەزدەسكەن ەدى، ەندى باستى ماقسات — چەمپيون بولۋ. سوندا بالكىم، كەلەسى جولى «بارسەلونا» سياقتى الەمدىك كلۋبتار دا كەلەر. وكىنىشكە قاراي، جاراقات سالدارىنان وينامايمىن، ءبىراق جۇرەگىم ءاردايىم كومانداممەن بىرگە، — دەيدى ول.
كورەرمەندەر اراسىندا اعىلشىن جانكۇيەرلەرى دە بار. سولاردىڭ ءبىرى مانچەستەر قالاسىنان كەلگەن تانىمال بلوگەر جانە StuntPegg اتتى YouTube-ارناسىنىڭ اۆتورى نيۆ پەترۋسسيەللو.
— قازاقستان تۋرالى جاقىندا عانا ەستىدىم، ءبىراق ءبارىن ءوز كوزىممەن كورۋ قىزىق بولدى. «قايرات» جايلى كوپ وقىدىم. ءوزىم فۋتبولمەن تىنىستايتىن قالا — مانچەستەردەنمىن. بىلەمىن، بىرنەشە جىل بۇرىن «مانچەستەر يۋنايتەد» «استانامەن» ويناعان. ەندى «قايرات» پەن «استانانىڭ» ويىنىن كورۋگە كەلدىم، ەكەۋى دە وتە مىقتى كوماندالار، سوندىقتان ويىن اسەرلى بولاتىنى انىق، — دەدى نيۆ.
قازاقستان مەن شەتەلدەن كەلگەن جانكۇيەرلەردى بىرىكتىرگەن بۇل ماچ ەلدەگى سپورت ينفراقۇرىلىمىنىڭ دامۋىن جانە الماتىنىڭ ءىرى سپورتتىق ورتالىق رەتىندەگى مارتەبەسىن ايقىن كورسەتتى. كورەرمەندەردىڭ قولداۋى ويىنعا ەرەكشە رۋح پەن اتموسفەرا سىيلادى. وسىلايشا، الماتى تاعى دا ءوز مارتەبەسىن — قازاقستاننىڭ سپورت استاناسى ەكەنىن دالەلدەدى.