الماتى قالاسىندا ازاماتتاردى مەرزىمدى اسكەري قىزمەتكە شاقىرۋ جۇيەسىن جەتىلدىرۋ بويىنشا جۇيەلى جۇمىس جۇرگىزىلۋدە.
قالا اكىمدىگى اسكەرگە شاقىرۋ ناۋقانىنىڭ تيىمدىلىگىن ارتتىرۋعا باعىتتالعان كەشەندى شارالاردى جۇزەگە اسىرىپ كەلەدى، - دەپ حابارلايدى Aqshamnews.kz.
نەگىزگى باعىتتاردىڭ ءبىرى – قالالىق جيناق پۋنكتىن (قجپ) ورنالاستىرۋ ماسەلەسىنىڭ شەشىلۋى بولدى. قالا اكىمى تاپسىرماسى بويىنشا قجپ تۇركسىب اۋدانىندا، ۆ. بەرينگا كوشەسى، 31 مەكەنجايىنداعى بۇرىن الماتى قالاسىنىڭ ءىىم اكادەمياسى ورنالاسقان عيماراتقا اۋىستى.
جالپى اۋدانى 2800 شارشى مەتر، ىرگەلەس اۋماعى 0،63 گەكتار نىسان تولىق پايدالانۋعا دايىن جانە قازىرگى زامانعى قاۋىپسىزدىك پەن ينفراقۇرىلىم تالاپتارىنا تولىق سايكەس كەلەدى. عيماراتتا اكت زالى، سپورت زالى جانە اسحانا بار، بۇل اسكەرگە شاقىرىلۋشىلار مەن قىزمەتكەرلەر ءۇشىن بارىنشا قولايلى جاعداي جاساۋعا مۇمكىندىك بەرەدى.
عيمارات قالانىڭ كوممۋنالدىق مەنشىگىنە بەرىلىپ، الماتى قالاسىنىڭ موبيليزاسيالىق دايىندىق جانە اۋماقتىق قورعانىس قىزمەتىنىڭ بالانسىنا بەكىتىلدى.
بيىل الماتى قالاسى جۇمىلدىرۋ دايىندىعى، اۋماقتىق جانە ازاماتتىق قورعانىس باسقارماسى عيماراتتا اعىمداعى جوندەۋ جۇمىستارىن جۇرگىزدى. جوندەۋ بارىسىندا ينجەنەرلىك جەلىلەر جاڭارتىلىپ، ىشكى ارلەۋ جانە اۋماقتى اباتتاندىرۋ جۇمىستارى اتقارىلدى. بۇل قىزمەتكەرلەر مەن اسكەرگە شاقىرىلۋشىلار ءۇشىن جايلى جاعداي جاساۋعا مۇمكىندىك بەردى.
بۇعان دەيىن، 2019 جىلدان باستاپ، قالالىق جيناق پۋنكتى ۋاقىتشا قورعانىس مينيسترلىگىنىڭ «اسكەري-تەحنيكالىق مەكتەبى» رمك بازاسىندا (بوستاندىق اۋدانى) ورنالاسقان بولاتىن. 2025 جىلدىڭ كوكتەمىندە 1 686 ادام، ال كۇزگى اسكەرگە شاقىرۋ كەزىندە 1 930 ادام شاقىرىلعانىن ەسكەرە وتىرىپ، پۋنكتتى جاڭا، ارنايى بەيىمدەلگەن عيماراتقا كوشىرۋ تۋرالى شەشىم قابىلداندى.
اسكەرگە شاقىرۋعا دايىندىق جانە ونى وتكىزۋ جۇمىستارى قالانىڭ بارلىق اۋدانىندا بەلسەندى تۇردە جالعاسىپ جاتىر.