ءىس-شاراعا 50 دەن استام ۆولونتەرلەر كەلدى
مەگاپوليستىڭ “جەلتوقسان” ساياباعىندا رەسپۋبليكا كۇنىنە وراي مەرەكەلىك ءىس-شارا ۇيىمداستىرىلدى. "جەلتوقسان" قب جانە الماتى قالاسى بويىنشا «اسسامبلەيا جاستارى» رقب وكىلدەرىنىڭ قاتىسۋىمەن اعاش وتىرعىزۋ، سونداي-اق ساياباقتىڭ ىرگەلەس اۋماعىن اباتتاندىرۋ جانە سانيتارلىق تازارتۋ جۇمىستارى جۇرگىزىلدى، دەپ حابارلايدى Almaty-akshamy.kz.
“مەرەكەلىك كۇنتىزبەمىزگە ەنگەن رەسپۋبليكا كۇنىن تويلاۋ باستالىپ كەتتى. بۇگىنگى شاراعا جەلتوقسانشىلار مەن جاستار بىرىگىپ اتسالىسىپ جاتىر. 1000-نان استام اعاش وتىرعىزدىق. سپورتتىڭ بىرنەشە تۇرىنەن جارىستار وتكىزىلىپ، ءبارىمىز ءماز مەيرام بولىپ جاتقان جايىمىز بار. ەلىمىزدىڭ مەرەيى اسقاقتاپ، ەگەمەندىگىمىز ارتا بەرسىن دەگەن تىلەك بىلدىرەمىز”، - دەيدى الماتى قالالىق “جەلتوقسان قوعامى” ۇيىمىنىڭ ءتوراعاسى نۇرلىبەك قۋانبايەۆ.
ءىس-شارا قوناقتارى ءۇشىن كونسەرتتىك باعدارلاما، التىن ساقا، تۇماق اتۋ، ارقان تارتۋ سەكىلدى ۇلتتىق سپورت تۇرىنەن جارىستار جانە مەرەكەلىك داستارحان ۇسىنىلدى.
“ءىس-شاراعا 50 دەن استام ۆولونتەرلەر كەلدى. بۇدان بولەك ستۋدەنتتەر، «اسسامبلەيا جاستارى» ءوز ۇلەستەرىن قوسۋدا. جاستار بولىپ ۇلكەن بۋىن وكىلدەرىنىڭ اڭگىمەلەرىن، ونەگەلەرىن ەستىپ، اعاش وتىرعىزۋ ارقىلى يگى شارانى قولعا الۋدى ءجون سانادىق. اعالارىمىزدان “جەلتوقسان” وقيعاسى كەزىندەگى ساتتەردى سۇراپ تانىم كوكجيەگىمىزدى ارتتىرىپ جاتىرمىز. سونداي-اق، تابيعات اياسىندا دەمالىپ، سۋرەتكە دە ءتۇسۋ مۇمكىندىگىنە يە بولدىق”، - دەيدى قازاقستان ەرىكتىلەر قوعامدىق قورىنىڭ جوبا مەنەدجەرى نۇرجان ءمادي.
وسى رەتتە، قالادا وتىرعىزىلاتىن اعاش تۇرلەرى عىلىمي قاۋىمداستىق پەن لاندشافت ساراپشىلارىنىڭ قاتىسۋىمەن، كليماتتىق جانە توپىراق ەرەكشەلىكتەرىنە قاراي تاڭداپ الىناتىنىن ايتا كەتكەنىمىز ءجون.
اتاپ وتەرلىگى، بۇگىندە اۋقىمدى كوگالداندىرۋ جۇمىستارىنىڭ قارقىندى جۇرگىزىلۋىمەن قاتار، جالپى كوگالداندىرۋ ساياساتى دا تۇبەگەيلى وزگەردى. باستى نازار باقىلاۋسىز اعاش وتىرعىزۋلاردان جاسىل قوردى ەمدەۋ مەن بيواركەلكىلىكتى ساقتاۋعا قاراي اۋىستى. جاسىل جەلەكتى سۋارۋ جۇمىستارىن كۇشەيتۋ ءۇشىن جاڭا سۋ ۇڭعىمالارى سالىنىپ، ارىق جۇيەسى تۇگەندەلدى.