ەكونوميكانىڭ ءتۇرلى سالاسىندا ءبىرقاتار جوبا ىسكە اسىرۋ ساتىسىندا تۇر
قازاقستان مەن تۇرىكمەنستان اراسىنداعى ءوزارا ساۋدا 2 ەسەگە ءوستى. بۇل تۋرالى بۇگىن اقوردادا تۇرىكمەنستان پرەزيدەنتى سەردار بەردىمۇحامەدوۆپەن كەلىسسوزدەردەن كەيىنگى ب ا ق وكىلدەرىنە ارنالعان بريفينگىدە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىن ءبىز قازاق-تۇرىكمەن قارىم-قاتىناستارىنىڭ ستراتەگيالىق سيپاتىن تاعى دا راستادىق جانە باۋىرلاس حالىقتارىمىزدى ودان ءارى جاقىنداستىرۋعا ءوزارا ۇمتىلىسىمىزدى بىلدىردىك. دوستىق پەن ءوزارا ءتيىمدى تۇردە كوپجوسپارلى ىنتىماقتاستىعىمىزدىڭ باسىمدىقتارىن ايقىندادىق. ساۋدا-ەكونوميكالىق سەرىكتەستىككە ەرەكشە كوڭىل ءبولىندى. وتكەن جىلدىڭ قورىتىندىسىندا بىرلەسكەن ءىس-شارالاردىڭ ارقاسىندا ەكىجاقتى تاۋار اينالىمىمىز ەكى ەسەگە ارتىپ، 250 ملن دوللاردان استى. بيىل دا وڭ ديناميكا ساقتالدى. 7 ايدا ءوزارا ساۋدانىڭ ەكى ەسە ءوسۋى قامتاماسىز ەتىلدى»، – دەدى قاسىم-جومارت توقايەۆ.
مەملەكەت باسشىسى ۇكىمەتارالىق بايلانىستار، سونداي-اق ەكى ەلدىڭ ىسكەر توپتارى اراسىنداعى بايلانىستار ايتارلىقتاي جاندانعانىن اتاپ ءوتتى.
«ەكونوميكانىڭ ءتۇرلى سالاسىندا ءبىرقاتار جوبا ىسكە اسىرۋ ساتىسىندا تۇر. سوندىقتان، بىزدە ساۋدا-ەكونوميكالىق كووپەراسيانى تەرەڭدەتۋ ءۇشىن ايتارلىقتاي رەزەرۆتەر بار دەپ سانايمىز. وسىعان بايلانىستى ءبىز ەكونوميكالارىمىزدىڭ ءوزارا تولىقتىرىلۋىن ەسكەرە وتىرىپ، ەكسپورتتى ءارتاراپتاندىرۋ قاجەتتىگىن بەلگىلەدىك»، - دەدى قاسىم-جومارت توقايەۆ.