«ەسەنتاي» وزەنىنىڭ بويىندا رەسپۋبليكا كۇنىنە ارنالعان «جاستار گراففيتي» فەستيۆالى ءوتتى. ءىس-شارانى الماتى قالاسىنىڭ جاستار ساياساتى باسقارماسى مەن قالانىڭ جاستار ساياساتىن دامىتۋ مەملەكەتتىك قورى ۇيىمداستىردى، دەپ حابارلايدى Almaty-akshamy.kz.
ازيز ورالبەك ۇلى، الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى:
-بۇل فەستيۆالدىڭ باستى ماقساتى - ءبىزدىڭ كرەاتيۆتى، تالانتتى جاستاردىڭ باسىن بىرىكتىرۋ. وسى جەردە 50-دەن استام جاس سۋرەتشىلەر جينالدى. جاس سۋرەتشىلەر قالا دەڭگەيىندەگى سۋرەتشىلەر كلۋبىنىڭ، دەمالىس ورتالىقتارىنىڭ قاتىسۋشىلارى. فەستيۆال وتەتىنىن ەستىپ، قاتىسۋعا نيەت بىلدىرگەن ستۋدەنتتەر دە بار. رەسپۋبليكا كۇنىنە وراي ەڭ باستى ەسكيزدى سالىپ جاتىر. ول جەردە نەگىزىنەن الماتى قالاسىنىڭ كورىكتى جەرلەرىن ورنەكتەيدى. سۋرەتشىلەرگە ەركىندىك تە بەرىلدى. وزدەرى ويىنداعى سۋرەتتەرىن سالادى. ءبىر قۋانتارلىعى، سۋرەت سالۋ بارىسىندا جاستاردىڭ نەگىزگى ويى بىرلىك، ەركىندىك، تۇراقتىلىق قاعيداتىنا سايكەس كەلىپ وتىر. بۇل شارا ءبىر كۇن عانا بولمايدى. ءبىز ءاربىر 8 اۋداندا قايتالانباس سۋرەتتەردى سالىپ شىعامىز. رەسپۋبليكا كۇنىنە وراي كوپتەگەن ءىس شارالار وتكىزۋ جوسپاردا بار.
«رەسپۋبليكا كۇنىنە وراي ۇيىمداستىرىلعان فەستيۆالدە باسقا دا سۋرەتشىلەرمەن بىرگە ارنايى ەسكيز سالىپ جاتىرمىز. گراففيتيمەن 5-6 جىلدان بەرى اينالىسامىن. الماتى قالاسىنىڭ بەينەسىن گراففيتي ارقىلى كورسەتەمىز»،- دەدى ت.جۇرگەنوۆ اتىنداعى ونەر اكادەمياسىنىڭ ستۋدەنتى، سۋرەتشى ەركەبۇلان ءبورىباي ۇلى.
