تۇركسىب اۋدانىنىڭ «جاس قانات» شاعىن اۋدانىندا قاراۋسىز قالعان اۋماق جايلى قوعامدىق كەڭىستىككە اينالدى. جوبا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلدى، دەپ حابارلايدى aqshamnews.kz
سكۆەر اۋماعىندا كەشەندى جۇمىستار جۇرگىزىلدى: اسفالت پەن كەسپە تاس توسەلدى، كوشەگە جارىقتاندىرۋ ەلەمەنتتەرى، اۆتوماتتى سۋارۋ جۇيەلەرى، ورىندىقتار مەن قوقىس جاشىكتەرى ورناتىلدى. سونىمەن قاتار، اۆتوتۇراق ورىندارى جابدىقتالىپ، ارىق جۇيەسى جۇرگىزىلدى. الداعى ماۋسىمدا جاس كوشەتتەر وتىرعىزۋ جوسپارلانىپ وتىر، بۇل سكۆەردى ودان ءارى جاسىل جەلەككە اينالدىرىپ، جايلى ەتە تۇسەدى.
جاڭا كەڭىستىكتىڭ باستى ەرەكشەلىگى – اۋدانى 450 م² بولاتىن مۇز ايدىنى. جاز مەزگىلىندە ول روليك تەبۋگە ارنالعان الاڭعا اينالماق. مۇز ايدىنى جەرگىلىكتى تۇرعىنداردىڭ، اسىرەسە بالالاردىڭ كوڭىلىنەن شىقتى. ولار بۇل جەردە ۋاقىتىن قىزىقتى وتكىزۋدە.
«ماعان ساباقتان كەيىن وسىندا كەلىپ، سىرعاناۋ قاتتى ۇنايدى. ۇيىمە جاقىن جەردە مۇز ايدىنى بولسا ەكەن دەپ كوپتەن ارمانداعان ەدىم. ءقازىر مەن مانەرلەپ سىرعاناۋدىڭ كەيبىر ەلەمەنتىن ۇيرەنىپ الدىم، ءتىپتى ارتقا سىرعاناي الامىن. ءقازىر دوستارىممەن بىرگە جاڭا ەلەمەنتتەردى: اينالۋ مەن سپيرالدى ۇيرەنىپ ءجۇرمىز. كەشكە كەلسەڭىز كەرەمەت، گيرلياندالار جانىپ تۇرادى، ءبارى وتە ادەمى ءارى ەرەكشە اتموسفەرا بەرەدى»، – دەدى «جاس قانات» شاعىن اۋدانىنىڭ تۇرعىنى ارمان باتىروۆ.
تۇركسىب اۋدانىندا «حالىق قاتىساتىن بيۋدجەت» باعدارلاماسى اياسىندا جالپى 40 كوركەيتۋ جوباسى جوسپارلانعان. باعدارلامانىڭ تيىمدىلىگىن جانە تۇرعىنداردىڭ بەلسەندىلىگىن ەسكەرە وتىرىپ، 2024 جىلى الماتى اكىمى ەربولات دوسايەۆ قارجىلاندىرۋدى 18،8 ملرد تەڭگەگە دەيىن ارتتىردى، بۇل 2023 جىلمەن سالىستىرعاندا 5،8 ملرد تەڭگەگە كوپ. وسىلايشا، الماتىلىقتارعا اۋلالاردى، قوعامدىق كەڭىستىكتەردى، سپورت جانە بالالار الاڭدارىن قۇرۋعا ارنالعان 364 جوبانى ۇسىنۋ مەن جۇزەگە اسىرۋ مۇمكىندىگى بەرىلدى.