قازاقستان رەسپۋبليكاسى مەملەكەتتىك ورتالىق مۋزەيىندە تانىمال قوعام قايراتكەرى، قازاقستاننىڭ كورنەكتى سۋرەتشىسى بولات مۇحامەدييەۆتىڭ «ۋاقىت رەزونانسى» اتتى جەكە كورمەسىنىڭ سالتاناتتى اشىلۋ ءراسىمى ءوتتى. كورمەنىڭ اشىلۋىندا قازاقستان ونەر اكادەمياسىنىڭ جانە «MONDIAL ART ACADEMIA» دۇنيەجۇزىلىك ونەر اكادەمياسىنىڭ اكادەميگى بولات مۇحامەدييەۆتىڭ شىعارماشىلىعىنا ارنالعان جاڭا تۋىندىلارى كوپشىلىك نازارىنا ۇسىنىلدى، دەپ حابارلايدى aqshamnews.kz.
بولات مۇحامەدييەۆ — قازاقستاننىڭ جەتەكشى سۋرەتشىلەرىنىڭ ءبىرى، ول ونەر الەمىندەگى ءوز ورنىن ەرەكشە ەڭبەكتەرىمەن العان تۇلعا. ونىڭ تۋىندىلارى ءاردايىم كوركەمدىك دەڭگەيىمەن جانە تەرەڭ فيلوسوفيالىق مازمۇنىمەن ەرەكشەلەنەدى. قازاقستان ونەر اكادەمياسىنىڭ اكادەميگى جانە «MONDIAL ART ACADEMIA» دۇنيەجۇزىلىك ونەر اكادەمياسىنىڭ مۇشەسى رەتىندە ونىڭ شىعارماشىلىعى الەمدىك دەڭگەيدە جوعارى باعالانىپ كەلەدى.
كورمەدە ۇسىنىلعان «ۋاقىت رەزونانسى» شىعارمالارى — سۋرەتشى ءۇشىن ەرەكشە ماڭىزعا يە. بۇل تۋىندىلاردا اۆتور ۋاقىتتىڭ وزگەرىستەرىن، ونىڭ قوعام مەن ادامنىڭ ومىرىنە اسەرىن كوركەم تىلمەن جەتكىزەدى. ءاربىر كارتينا تەرەڭ ءمان-ماعىناعا تولى، ولاردى تاماشالاعان سايىن ۋاقىت پەن كەڭىستىك اراسىنداعى بايلانىس تۋرالى جاڭا ويلارعا شوماسىڭ.
«ۋاقىت رەزونانسى» كورمەسى — بولات مۇحامەدييەۆتىڭ شىعارماشىلىعىن جاڭا قىرىنان تانىتۋعا مۇمكىندىك بەرەدى. كورمە زالىندا ءاربىر تۋىندىنىڭ ارتىندا فيلوسوفيالىق وي، زاماناۋي ءومىردىڭ ماڭىزدى ماسەلەلەرى مەن ادامزاتتىڭ بولاشاعىنا دەگەن تەرەڭ كوزقاراس جاتىر. كورمەگە كەلۋشىلەر سۋرەتشىنىڭ تۋىندىلارىندا كەزدەسەتىن ءتۇرلى ونەر باعىتتارى مەن تەحنيكالارىمەن تانىسىپ، ونىڭ شىعارماشىلىعىنىڭ ءتۇرلى قىرلارىن اشا الادى.
قازاقستان رەسپۋبليكاسى مەملەكەتتىك ورتالىق مۋزەيىندە وتكەن بۇل كورمە تەك قانا ونەر سۇيەر قاۋىم ءۇشىن ەمەس، بارلىق قوعام ءۇشىن ۇلكەن ماڭىزى بار مادەني وقيعا بولىپ تابىلادى.