الاتاۋ اۋدانىنداعى وقۋشىلاردىڭ يننوۆاسيالىق شىعارماشىلىق ورتالىعىندا "پاتريوتتىق رۋح – باستى قۇندىلىق" تاقىرىبىندا ۇيىمداستىرىلعان ەسسە جازۋ بايقاۋىنىڭ جەڭىمپازدارى ماراپاتتالدى. ءىس-شارانى رەسپۋبليكالىق "جاناشىر" حالىقارالىق قوعامدىق قورى الماتى قالاسىنىڭ قوعامدىق دامۋ باسقارماسىنىڭ قولداۋىمەن وتكىزدى.
بۇل شارانىڭ باستى ماقساتى – وقۋشىلار اراسىندا پاتريوتتىق قۇندىلىقتاردى ناسيحاتتاپ، ولاردىڭ شىعارماشىلىق قابىلەتتەرىن دامىتۋ جانە قولداۋ.
– كونكۋرسقا الماتى قالاسىنىڭ 40 مەكتەبىنەن 200-دەن استام وقۋشى قاتىستى. بايقاۋعا 4-6 جانە 7-9-سىنىپ وقۋشىلارى ءوز جۇمىستارىن ۇسىندى. قازىلار القاسى ولاردىڭ شىعارمالارىن مۇقيات سارالاپ، ۇزدىك ەسسەلەردى انىقتادى. جەلتوقسان وقيعاسى، تاۋەلسىزدىك، وتان جانە پاتريوتتىق سەزىم تاقىرىپتارىنا قالام تەربەگەن وقۋشىلار باعالى سىيلىقتارمەن ماراپاتتالدى. ءىس-شاراعا "الماتى اقشامى"، "ۇلان"، "درۋجنىە رەبياتا" باسىلىمدارىنىڭ وكىلدەرى دە قاتىسىپ، بىزگە قولداۋ كورسەتتى، – دەدى جوبا جەتەكشىسى، "جاناشىر" حالىقارالىق قوعامدىق قورىنىڭ ءتورايىمى جاڭىل اپەتوۆا.
شىعارماشىل وقۋشىلارعا ەرەكشە سىي
Alatau-Aqparat مەدياحولدينگىنە قاراستى "الماتى اقشامى" گازەتى شىعارماشىل ورەندەردى قولداۋ ماقساتىندا ارنايى سىيلىق تاعايىندادى.
– ءبىزدىڭ گازەت ۇجىمى №99 مەكتەپتىڭ 5-سىنىپ وقۋشىسى ايجان ءجۇمادىلدانىڭ ەسسەسىن ۇزدىك دەپ تانىدى. ايجان ءوز شىعارماسىندا اتاسى مەن اجەسىنىڭ تاربيەسىن نەگىزگە الا وتىرىپ، ءپاتريوتيزمدى ۇلكەندەردەن العان ونەگەمەن شەبەر ۇشتاستىرعان. "وتان – وتباسىنان باستالادى" دەسەك، بۇل ەسسەدەن مەيىرىمدىلىك، قامقورلىق، ەلگە دەگەن سۇيىسپەنشىلىككە باعىتتالعان تاربيەنىڭ كورىنىسىن بايقادىق. وسىنداي ورتادا وسكەن بالانىڭ بولاشاعى جارقىن بولارى ءسوزسىز، – دەپ اتاپ ءوتتى سىيلىقتى تابىستاعان "الماتى اقشامى" گازەتىنىڭ ءبولىم رەداكتورى، "اقپارات سالاسىنىڭ ۇزدىگى" نۇرجامال الىشيەۆا.
بۇل بايقاۋ الماتىلىق وقۋشىلاردىڭ پاتريوتتىق رۋحىن وياتىپ، ولاردىڭ شىعارماشىلىق الەۋەتىن ارتتىرۋعا سەرپىن بەردى. ەلىن، جەرىن سۇيەتىن ۇرپاق تاربيەلەۋ جولىندا وسىنداي شارالاردىڭ ماڭىزى زور.