الماتىدا بيزنەسى زارداپ شەككەن كاسىپكەردىڭ ءوتىنىشىن قاراۋ مەرزىمى قىسقاردى

1 ايدان 2 اپتاعا دەيىن قىسقارتىلدى.

الماتىدا جاپپاي تارتىپسىزدىك كەزىندە كاسىبىنە شىعىن كەلتىرىلگەن 3 592 ادامنان ءوتىنىش ءتۇستى. ونىڭ ىشىندە 85 ءوتىنىش كەرى قايتارىلدى. بۇل تۋرالى ونلاين بريفينگ بارىسىندا الماتى قالالىق كاسىپكەرلەر پالاتاسىنىڭ ديرەكتورى ايتۋار قوشمامبەتوۆ ايتتى، دەپ حابارلايدى Almaty-akshamy.kz

«23 قاڭتار مەن 23 اقپان ارالىعىندا Infokazakhstan سايتىنا الماتىلىق كاسىپكەرلەردەن 1572 ءوتىنىش كەلىپ ءتۇستى. الايدا وتىنىشتەردىڭ كەيبىرى بىرنەشە رەت قايتالانعان. سوندىقتان، كاسىپكەرلەر پالاتاسى اۋداندىق اكىمدىكتەرمەن بىرگە زارداپ شەككەن كاسىپكەرلەردى انىقتاۋ جونىندە جۇمىستار جۇرگىزىپ، وتەماقى تولەۋ سوماسىنىڭ قورىتىندىسىن شىعاردى»، - دەيدى ول.

تەكسەرىس قورىتىندىسى بويىنشا، 1413 كاسىپكەردىڭ بيزنەسى زارداپ شەككەنى انىقتالدى. ولارعا كەلتىرىلگەن شىعىن - 34 316 437 000 تەنگە.

«قازىرگى ۋاقىتتا ارنايى كوميسسيامەن 755 ءوتىنىم قارالدى، ولار 2،2 ملرد تەڭگە. مەملەكەتتىك بيۋدجەتپەن 372 ءوتىنىش قارالدى، ول 1،2 ملرد تەڭگە بولادى»، – دەدى سپيكەر.

ونىڭ ايتۋىنشا، وتىنىشتەردىڭ 317ء-ى ساۋدا سالاسىنا تيەسىلى. اتاپ ايتساق زەرگەرلىك بۇيىمدار دۇكەنى، ۇيالى تەلەفون، كيىم-كەشەك جانە باسقاسى. بيزنەس ورتالىق بويىنشا 34 ءوتىنىم، قوعامدىق تاماقتانۋ نىساندارى بويىنشا 26 ءوتىنىم، لومبارد – 4، باعالاۋ كومپانياسى مەن ليزينگتى تەرمينالدار بويىنشا 9 ءوتىنىم ماقۇلداندى.

«مەملەكەت باسشىسىنىڭ بيزنەسكە جەدەل كومەك كورسەتۋ تاپسىرماسىن ىسكە اسىرۋ اياسىندا جەڭىلدەتىلگەن تەتىك بويىنشا تولەم سوماسى 10 ملن تەڭگەگە دەيىن ۇلعايتىلدى، سونداي-اق وتىنىمدەردى قاراۋ مەرزىمى ەكى ەسەگە - 1 ايدان 2 اپتاعا دەيىن قىسقارتىلدى»، – دەدى ايتۋار قوشمامبەتوۆ.