الماتى ءماسليحاتى اباتتاندىرۋدىڭ جاڭا ەرەجەلەرىن بەكىتتى
VIII سايلانعان ءماسليحاتتىڭ كەزەكتەن تىس ءححى سەسسياسى بارىسىندا دەپۋتاتتار الماتى قالاسى اۋماعىن اباتتاندىرۋدىڭ جاڭا ەرەجەلەرىن بەكىتتى، دەپ حابارلايدى almaty-akshamy.kz
وتىرىس بارىسىندا الماتى قالاسى اكىمىنىڭ ورىنباسارى اسقار ءامرين ءقاۋىپسىز، ىڭعايلى جانە ەكولوگيالىق قولايلى قالالىق ورتانى قۇرۋعا باعىتتالعان ەرەجەلەردىڭ بىرنەشە ماڭىزدى اسپەكتىسىن اتادى.
«بىرىنشىدەن، ەرەجەلەردە بۇقارالىق ءىس-شارالاردى ۇيىمداستىرۋشىلاردىڭ جاۋاپكەرشىلىگى بەكىتىلەدى. ءىس-شارادان كەيىن ولار تازالىق جۇمىستارىن جۇرگىزۋگە جانە اۋماقتاردى اباتتاندىرىلعان كورىنىسكە قايتارۋعا مىندەتتى بولادى. كونسەرتتەر، فەستيۆالدەر، جارمەڭكەلەر جانە باسقا دا شارالاردىڭ كوپتىگىن ەسكەرە وتىرىپ، بۇل الماتى ءۇشىن وزەكتى جانە قاجەتتى شارا بولىپ تابىلادى»، - دەدى اسقار ءامرين.
ينفراقۇرىلىمدى دامىتۋ كەزىندە جاياۋ جۇرگىنشىلەردىڭ، قوعامدىق جانە ۆەلوسيپەد كولىگىنىڭ جانە ارىق جۇيەلەرىنىڭ باسىمدىعى بەكىتىلەدى. بۇل نورما قالا تۇرعىندارىنىڭ سۇرانىسىن ەسكەرە وتىرىپ ازىرلەندى.
بۇعان قوسا، كورىكتەندىرۋ پاسپورتتارىن قولدانۋ جالعاسادى، ولار 2013 جىلدان بەرى توقتاتىلعان.
پاسپورتقا اۋماق يەسى جانە اۋدان اكىمدىگى قول قويادى. قۇجاتتا تروتۋارلاردىڭ، جاسىل جەلەكتەردىڭ، قاسبەتتىڭ جاعدايلارىنا، پاندۋستار، قورشاۋلار، كوشە جيھازدارى سياقتى ەلەمەنتتەرمەن جابدىقتاۋعا قويىلاتىن تالاپتار بەكىتىلەدى.
پاسپورتتى ەنگىزۋ كاسىپكەرلىك نىساندارداعى جانە جەكە مەنشىكتەگى اۋماقتاردىڭ جاعدايلارىن باقىلاۋدى جاقسارتادى.
ءوز كەزەگىندە كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆ ەرەجەنى قابىلداۋ – ەكولوگيالىق جاعدايدى جاقسارتۋعا جانە قالا اۋماعىن اباتتاندىرۋعا باعىتتالعان «تازا قازاقستان» اكسياسى اياسىنداعى ماڭىزدى قادام ەكەنىن ايتتى.