قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى اكىمى باقىتجان ساعىنتايەۆ دەنساۋلىق ساقتاۋ جۇيەسى مەن ءبىلىم بەرۋدى دامىتۋ جانە مودەرنيزاسيالاۋ تۋرالى ايتتى.
دەنساۋلىق ساقتاۋ سالاسىن ودان ءارى دامىتۋ ماقساتىندا بيىلعى جىلى الماتىدا بالالارعا جەدەل مەديسينالىق كومەك كورسەتۋ ورتالىعىنىڭ وتا جاساۋ بلوگى قابىلداۋ ءبولىمىنىڭ جاڭا كورپۋسىن سالۋ جوسپارلانۋدا.
قۇلجا تراكتىسىندە اۋرۋحانالىق كلاستەردى دامىتۋ جوسپارلانۋدا، مۇندا ونكولوگيالىق ورتالىق پەن جقتب ورتالىعى بار ءپاللياتيۆتى كومەك ورتالىعى سالىناتىن بولادى.
مەديسينالىق قىزمەتتەردىڭ قادامدىق قولجەتىمدىلىگىن قامتاماسىز ەتۋ ماقساتىندا بيىل ءارقايسىسى 200 كەلۋشىگە ارنالعان ءتورت وتباسىلىق-دارىگەرلىك امبۋلاتوريا سالۋ جوسپارلانۋدا.
الماتىنىڭ مەديسينالىق ۇيىمدارىندا كادر تاپشىلىعىن جويۋ جوباسى ماقۇلداندى. وتە تاپشى مەديسينالىق ماماندىقتار بويىنشا رەزيدەنتۋرادا وقۋ ءۇشىن 120 گرانت بولىنەدى. بىلىكتىلىكتى ارتتىرۋ اياسىندا 5 ايدا 1253 دارىگەر مەن مەيىربيكە، سونداي-اق ۆاكسينالاۋ ورتالىقتارىندا جۇمىس ىستەيتىن مىڭعا جۋىق ەرىكتىلەر – ستۋدەنتتەر، ينتەرندەر مەن رەزيدەنتتەر بىلىمدەرىن جەتىلدىردى.
مەديسينا قىزمەتكەرلەرىن قولداۋ ماقساتىندا كوتەرمەلەۋ تولەمدەرى مەن جالاقىعا ۇستەمە اقى بەلگىلەندى، سونىمەن قاتار جاس دارىگەرلەردىڭ «الماتى جاستارىنا» قاتىسۋىنا مۇمكىندىكتەرى بار.
الماتىدا ءبىلىم بەرۋ سالاسىندا 278 مەكتەپ بار، ونىڭ 207ء-سى مەملەكەتتىك، 71ء-ى جەكە مەنشىك، بۇلاردا بارلىعى 288 887 وقۋشى وقيدى. بيىلعى وقۋ جىلىندا 11،5 مىڭ تۇلەك مەكتەپ ءبىتىردى. 900 تۇلەك ۇزدىك اتتەستات، 621ء-ى «التىن بەلگى» الدى.
قولجەتىمدى ورتا ءبىلىم بەرۋ ءۇشىن 12،6 مىڭ ورىندى سەگىز مەملەكەتتىك مەكتەپتىڭ، 1،7 مىڭ ورىندى التى جەكە مەكتەپتىڭ، 8 263 ورىندى 17 جاڭا مەكتەپتىڭ قۇرىلىسى جۇرۋدە، سونداي-اق ءتورت مەكتەپ سەيسميكالىق نىعايتىلۋدا. بۇل شارالار جىل سوڭىنا دەيىن 21 مىڭنان استام جاڭا وقۋشى ورىن قۇرۋعا مۇمكىندىك بەرەدى.
مەكتەپكە دەيىنگى ءبىلىم بەرۋ سالاسىندا 65 962 بالانى قامتىعان 832 مەكەمە بار. ورىن تاپشىلىعىن ازايتۋ جۇمىسى جالعاسۋدا، قازىرگى كەزدە 640 ورىندى ءتورت مەملەكەتتىك بالاباقشا سالىنۋدا. بۇلاردى جىلدىڭ سوڭىنا دەيىن پايدالانۋعا بەرۋ جوسپارلانۋدا. جىل باسىنان بەرى 1،7 مىڭ ورىندى 30 جەكە مەكتەپكە دەيىنگى مەكەمە اشىلدى. جىل سوڭىنا دەيىن 5 مىڭ ورىندى تاعى 35 جەكە بالاباقشا اشۋ جوسپارلانۋدا. مەملەكەتتىك تاپسىرىستا 20 441 ورىندى 397 مەكتەپكە دەيىنگى مەكەمە قاراستىرىلعان.
جىل سوڭىنا دەيىن 3-تەن 6 جاسقا دەيىنگى بالالاردى قامتۋدى 91%-عا دەيىن ارتتىرۋ جوسپارلانۋدا. بۇگىنگى كۇنى بۇل 89،7% قۇرايدى.
بالالار مەن جاسوسپىرىمدەردىڭ جان-جاقتى دامۋى ءۇشىن قوسىمشا ءبىلىم بەرۋ اياسىن كەڭەيتۋدىڭ تەتىكتەرى ىسكە اسىرىلۋدا. ماسەلەن، الماتىدا مەملەكەتتىك شىعارماشىلىق تاپسىرىستى جان باسىنا شاققاندا نورماتيۆتىك قارجىلاندىرۋ جوباسى جۇزەگە اسىرىلادى. بۇل 4 پەن 17 جاس ارالىعىنداعى بالالارعا سپورت سەكسيالارىنا جانە شىعارماشىلىق ۇيىرمەلەرگە تەگىن قاتىسۋعا مۇمكىندىك بەرەدى.
بيىلعى جىلى 4،2 مىڭنان استام بالالار مەن جاسوسپىرىمدەردى تەگىن ۇيىرمەلەرمەن قامتۋ جوسپارلانۋدا. جان باسىنا شاققاندا قارجىلاندىرۋ اياسىندا 4،5 مىڭ ادام سپورتتىق سەكسيالارعا تەگىن قاتىسا الادى.
الماتىدا جىل سوڭىنا دەيىن سپورتتىق ينفراقۇرىلىممەن قامتاماسىز ەتۋ ءۇشىن جەتىسۋ، الاتاۋ، مەدەۋ جانە تۇركسىب اۋداندارىندا التى دەنەشىنىقتىرۋ-ساۋىقتىرۋ كەشەنى سالىنادى. ءارقايسىسى تاۋلىگىنە 5 مىڭعا جۋىق ادامدى قابىلدايتىن بولادى.