الماتى جاسىل ايماقتا.
بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا الماتى قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى. سوعان قاراماستان، ونىڭ ايتۋىنشا، مەگاپوليستەگى جاعداي تۇراقتى، «جاسىل» ايماقتا ورنالاسقان، دەپ حابارلايدى Almaty-akshamy.kz.
سەبد ستاتيستيكاسىنا سايكەس، سوڭعى اپتادا كۆي جۇقتىرۋ جاعدايىنىڭ 1،2%-عا ازداپ وسكەنى بايقالادى. وسىلايشا، وتكەن 7 كۇندە 155 جۇقتىرۋ جاعدايى انىقتالسا، وسى جولى 187 جاعداي تىركەلدى. كوۆيد ناۋقاستارىنا ارنالعان توسەك-ورىندارىنىڭ 100 000 ادامعا شاققانداعى تولتىرىلۋ دەڭگەيى 9،2 (27 ادام) نەمەسە بولىنگەن 450 توسەك-ورىننىڭ 6%-ىن قۇرايدى.
«سوڭعى 7 كۇندە ينفەكسيانىڭ نەگىزگى وشاقتارى رەتىندە ساۋدا نىساندارى – 33،3%، قوعامدىق كولىكتەر – 41،6%، بازارلار – 5،4%، باسقا وڭىرلەرگە ساپارلار – 6،5% بولدى»، - دەدى ءا.قالىقوۆا.
سونداي-اق سپيكەردىڭ ايتۋىنشا، وتباسىندا ناۋقاس اداممەن بايلانىس– 7،1%، تۋىستارى مەن كورشىلەرىنە بارۋ كەزىندە – 3،0%، جۇمىس ورنىندا – 3،0% جۇقتىرۋ جاعدايلارى انىقتالعان. اۋرۋ جۇقتىرعانداردىڭ كوپشىلىگى 20-39 جاس ارالىعىنداعىلار – 46،5% جاعداي. ودان كەيىنگى ورىندا 40-59 جاس ارالىعىنداعى ازاماتتار – 22%، سونداي-اق 60 جانە ودان جوعارى جاستاعىلار – 16%.
بالالار مەن جاسوسپىرىمدەر اراسىندا بۇل ۆيرۋستى جۇقتىرۋ دەڭگەيى الدەقايدا تومەن: 1 جاسقا دەيىنگى بالالار – 6،4%، 14 جاسقا دەيىنگىلەر – 4،3%، 15-19 جاس ارالىعىنداعى جاسوسپىرىمدەر مەن جاستار – 6،9%.
بريفينگ سوڭىندا ءا.قالىقوۆا 6 اي سايىن بەلسەندى تۇردە ۆاكسيناسيا الۋ كەرەكتىگىن، ادام كوپ جينالاتىن جەرلەردەن اۋلاق بولۋدى، ال كەلۋشىلەر كوپ جينالاتىن قوعامدىق ورىنداردا بولۋ قاجەت بولعان جاعدايدا مەديسينالىق بەتپەردە كيۋدى، الەۋمەتتىك قاشىقتىقتى جانە جەكە باس گيگيەناسىن ساقتاۋعا كەڭەس بەردى.
ايتا كەتەيىك، الماتىدا ىندەت باستالعاننان بيىلعى 4 جەلتوقسانعا دەيىن كوروناۆيرۋستىق ينفەكسيانىڭ 257 522 جاعدايى تىركەلدى.