الماتىدا ءبىر اپتادا ەكى پاتەر توناعان كۇدىكتى ۇستالدى

كۇدىكتى بۇرىن التى رەت سوتتالعان.

الماتىدا بىرنەشە پاتەر ۇرلىعىنا قاتىسى بار كۇدىكتى ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

43 جاستاعى كۇدىكتى ءبىر اپتا ىشىندە ەكى الماتىلىق تۇرعىننىڭ ءۇيىن توناپ كەتكەن.

«قاسكوي ازىق-تۇلىك دۇكەنىن ەرلەرگە ارنالعان باربەرشوپپەن شاتاستىرىپ، ىشكە كىرىپ، عيماراتتا ەشكىم جوق ەكەنىن كورگەننەن كەيىن روۋتەردى ۇرلاپ كەتكەن. س. ەسىمدى ازامات 3ء-شى ىقشاماۋداندا ەكىنشى رەت بوتەننىڭ مۇلكىن ۇرلاعان. گاز قۇبىرىمەن كىرەبەرىستىڭ قالقاسىنا كوتەرىلىپ، تەرەزە ارقىلى پاتەرگە كىرىپ، سول جەردەن تەحنيكانى ۇرلاپ كەتكەن. كۇدىكتى قاماۋعا الىندى. ول 43 جاستا. بۇرىن التى رەت سوتتالعان، ونىڭ بەسەۋى – مۇلىكتىك قىلمىستار جاساعانى ءۇشىن. كۇدىكتى سوڭعى رەت 2010 جىلى ءبىر جارىم جىلعا سوتتالعان. ەر ادام ءوز كىناسىن تولىقتاي مويىنداپ، ىستەگەن ىسىنە وكىنەتىنىن مالىمدەدى»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

اتالعان دەرەك بويىنشا ق ر قك-نىڭ 188-بابى 3-بولىگىنىڭ 2،3- تارماعىنا (ۇرلىق) سايكەس، سوتقا دەيىنگى تەرگەۋ امالدارى جۇرگىزىلۋدە. ۇستالعان ادامنىڭ ىس-ارەكەتىنىڭ قوسىمشا ەپيزودتارىن انىقتاۋ بويىنشا قاجەتتى ءىس-شارالار جۇرگىزىلۋدە.