قازاق ۇلتتىق قىزدار پەداگوگيكالىق ۋنيۆەرسيتەتىندە جاراتىلىستانۋ ينستيتۋتىنىڭ بيولوگيا كابينەتى جانە حيميا مەن گەوگرافيا باعىتىنداعى ءدارىسحانالاردىڭ اشىلۋ سالتاناتى ءوتتى، دەپ حابارلايدى aqshamnews.kz
گەوگرافيا باعىتىنداعى ءدارىسحاناعا – قازاقستان گەوگرافيا عىلىمىنىڭ دامۋىنا ۇلەس قوسقان پروفەسسور ءالىم بىرماعامبەتوۆتىڭ، ال حيميا باعىتىنداعى ءدارىسحاناعا – قازاقستانداعى حيميانى وقىتۋ ادىستەمەسىنىڭ دامۋىنا ەلەۋلى ۇلەس قوسقان پەداگوگيكا عىلىمدارىنىڭ كانديداتى، پروفەسسور ابدۋللا مىرزاباي ۇلىنىڭ اتىنا بەرىلدى.
بۇل قادام – ءبىلىم بەرۋ پروسەسىن جاڭارتۋ جانە زاماناۋي تالاپتارعا ساي ەتىپ جەتىلدىرۋگە مۇمكىندىك بەرەدى.
اشىلۋ راسىمىنە ۋنيۆەرسيتەتءتىڭ ديرەكتورلار كەڭەسىنىڭ ءتوراعاسى ومارحان نۇرتاي ۇلى، QyzPU ءباسقارما-توراعاسى رەكتورى گۇلميرا قاناي، الماتى قالاسىنداعى حيميا-بيولوگيا باعىتىنداعى نازاربايەۆ زياتكەرلىك مەكتەبىنىڭ ديرەكتورى ماسليحات زامىربەكقىزى، پەداگوگيكا عىلىمىنىڭ كانديداتى، گەوگرافيا كافەدراسىنىڭ پروفەسسور مىندەتىن اتقارۋشى ماميروۆا قۋلاش نۇربەرگەن قىزى جانە پروفەسسور ابدۋللا مىرزاباي ۇلىنىڭ جۇبايى ەركىن تۋربەكوۆنا قاتىسىپ، قىزىل لەنتاسىن قيدى.
«ءمۇعالىم بالالارعا ءدارىس بەرەتىن بولعاندىقتان، ونىڭ ءبىلىمى زور بولۋى كەرەك. بۇگىنگى تاڭدا مەكتەپتەردە تەحنيكالىق جابدىقتاۋ جوعارى دەڭگەيدە. ستۋدەنتتەرىمىز سول جابدىقتارمەن جۇمىس ىستەي الۋى ءتيىس. ءبىلىمدى مۇعالىمنەن جوعارى ءبىلىم الاتىن بولسا، ولاردىڭ ەلىمىزدىڭ ەكونوميكاسىنا قوسار ۇلەسى مول بولادى. مىنە، وسىنىڭ ءبارىن ەسكەرىپ، زەرتحانالاردى بارلىق پاندەرگە قاتىستى جاڭارتۋدى ماقسات ەتىپ قويدىق. مەن ۋنيۆەرسيتەت وقىتۋشىلارى مەن ستۋدەنتتەرىنە سەنەمىن. وسى سالادا ولارعا تياناقتى جۇمىس تىلەيمىن»، – دەدى ديرەكتورلار كەڭەسىنىڭ ءتوراعاسى ومارحان وكسىكبايەۆ.
QyzPU-دا اشىلعان زاماناۋي بيولوگيا كابينەتى – ستۋدەنتتەردىڭ زەرتتەۋ داعدىلارىن قالىپتاستىرىپ، ولاردى بيولوگيا، ەكولوگيا، بيومەديسينا جانە باسقا دا عىلىم سالالارىندا كاسىبي مامان رەتىندە دايىنداۋعا مۇمكىندىك بەرەدى. بءىلىم بەرۋ قىزمەتى، تابيعاتتى زەرتتەۋ، عىلىمي دۇنيەتانىمدى قالىپتاستىرۋ جانە ءبىلىم الۋشىلاردىڭ زەرتتەۋ داعدىلارىن دامىتۋ – بيولوگيا كابينەتىنىڭ نەگىزگى باعىتتارى. بۇل فۋنكسيالاردىڭ نەگىزگى اسپەكتىلەرىنە: پراكتيكالىق داعدىلاردى دامىتۋ، عىلىمي ادىستەرمەن جۇمىس ىستەۋ، زەرتتەۋلەردى، تاجىريبەلەر مەن باقىلاۋلاردى ورىنداۋ، بيولوگيالىق پروسەستەردى مودەلدەۋ ءۇشىن ساندىق ميكروسكوپتاردى جانە كومپيۋتەرلىك باعدارلامالاردى قولدانۋ جاتادى.
«بۇگىن قارجىلىق-ەكونوميكالىق نەگىزدە جاساقتالعان بيولوگيالىق ءبىلىم بەرۋ كابينەتى اشىلىپ وتىر. بۇل كابينەتتە ستۋدەنتتەردىڭ ءبىلىم الۋىنا جانە عىلىمي-زەرتتەۋ جۇمىستارىن جۇرگىزۋىنە تولىق جاعداي جاسالعان. اتاپ ايتساق، ءبىلىم بەرۋ باعىتتارى بويىنشا دەمونستراسيالىق ماتەريالدار، ءتۇرلى پراكتيكالىق جانە زەرتحانالىق ساباقتارعا قاجەتتى قۇرال-جابدىقتارمەن قامتاماسىز ەتىلگەن. سونىمەن قاتار عىلىمي-زەرتتەۋ جۇمىستارىن جۇرگىزۋگە دە ۇلكەن مۇمكىندىك بەرىلىپ وتىر. بيوحيميالىق جانە مەديسينالىق باعىتتاعى عىلىمي-زەرتتەۋ جۇمىستارىنىڭ بارلىعى بولاشاقتا ستۋدەنتتەردىڭ بىلىكتىلىگىن ارتتىرۋعا سەپتىگىن تيگىزەدى»، – دەدى جاراتىلىستانۋ ينستيتۋتى، بيولوگيا كافەدراسىنىڭ باعدارلاما كوشباسشىسى اسقار مارالوۆيچ كالەكەشوۆ.
ءالىم بىرماعامبەت ۇلى اتىنداعى ءدارىسحانا عالىمنىڭ عىلىم مەن گەوگرافيا ءبىلىمىن دامىتۋداعى قاجىرلى ەڭبەگىن دارىپتەۋ ماقساتىندا اشىلدى. بۇل ءدارىسحانادا ستۋدەنتتەر گەوگرافيا سالاسىنداعى بىلىمدەرىن جەتىلدىرىپ، جاڭا زەرتتەۋلەرگە بەت بۇرا الادى.
«بۇگىن ءبىزدىڭ ينستيتۋتىمىزدا ەلەۋلى ءارى قۋانىشتى كۇن بولىپ وتىر. ءالىم بىرماعامبەتوۆتىڭ قۇرمەتىنە گەوگرافيا ادىستەمەلىك كابينەتى اشىلىپ، ونىڭ ەڭبەكتەرى مەن عىلىم جولىنداعى جەتىستىكتەرى، ءبىلىم الۋشىلارعا كورسەتكەن شاپاعاتى ارنايى QR كود ارقىلى كابينەتكە ءىلىنىپ، ستۋدەنتتەرىمىز ءۇشىن ۇلكەن مۇمكىندىكتەر اشىلىپ وتىر. بۇل كابينەت ستۋدەنتتەر ءۇشىن قۇتتى ۇياعا اينالاتىنىنا سەنىمدىمىز. سەبەبى ءالىم بىرماعامبەتوۆ قازىرگى تاڭعا دەيىن ءبىزدىڭ ماگيسترانتتار مەن دوكتورانتتارىمىزعا عىلىمي ادىستەمەلىك ەڭبەكتەرىن ۇسىنىپ، ۇستازدىق جولدان ءالى دە تالماي، ۇلى تۇلعا بولىپ جانىمىزدا ءجۇر. ءالىم بىرماعامبەتوۆتىڭ ەڭبەگى ۋنيۆەرسيتەتىمىز ءۇشىن اسا ماڭىزدى»، – دەدى جاراتىلىستانۋ ينستيتۋتىنىڭ ديرەكتورى گاۋحار بايتاشيەۆا.
سونداي-اق شاراعا عالىمنىڭ جاقىن تۋىستارى دا قاتىستى. ۋنيۆەرسيتەت باسشىلىعىنا العىس ءبىلدىرىپ، بولاشاق گەوگراف ماماندارعا ساتتىلىك تىلەدى.
«بۇل كابينەتتىڭ ماڭىزى وتە زور. ول كىسىنىڭ قازاقستانعا ارنالعان ەڭبەكتەرى، ءتۇرلى عىلىمي زەرتتەۋ جۇمىستارى، مەكتەپكە ارنالعان وقۋ قۇرالدارى، وقۋشىلارعا ارنالعان حرەستوماتيالارى مەن ءارتۇرلى كىتاپتارى ستۋدەنتتەرگە ۇلكەن اسەرىن تيگىزەدى دەپ ويلايمىن. ءوز تاراپىمنان ۋنيۆەرسيتەت باسشىلارىنا جانە ارىپتەستەرىمە العىسىمدى بىلدىرەمىن»، – دەدى ءالىم بىرماعامبەت ۇلىنىڭ كەلىنى، پەداگوگيكا عىلىمىنىڭ كانديداتى، گەوگرافيا كافەدراسىنىڭ پروفەسسور مىندەتىن اتقارۋشى ماميروۆا قۋلاش نۇربەرگەن قىزى.
ابدۋللا مىرزاباي ۇلى اتىنداعى حيميا ءدارىسحاناسى عالىمنىڭ قازاقستانداعى ءبىلىم سالاسىنداعى ەڭبەك ەتۋ جولى مەن قىزمەتىن، حيميانى وقىتۋ ادىستەمەسىنىڭ دامۋىنداعى ەلەۋلى ەڭبەكتەرىن دارىپتەۋ ماقساتىندا اشىلدى. ءدارىسحانا ستۋدەنتتەردىڭ حيميا ءپانىن تەرەڭىرەك مەڭگەرۋىنە جانە تاجىريبەلىك بىلىمدەرىن جەتىلدىرۋىنە مۇمكىندىك بەرەدى. زاماناۋي قۇرال-جابدىقتارمەن قامتىلىپ، ستۋدەنتتەردىڭ پراكتيكالىق داعدىلارىن دامىتۋعا باعىتتالعان.
«ابدۋللا مىرزاباي ۇلى تەك ۇستاز ەمەس، ۇلى تۇلعا دەپ اتاعىم كەلەدى. عالىمنىڭ ەڭبەگى ماڭگىلىك، سەبەبى ءبىزدىڭ ۋنيۆەرسيتەتىمىزدە 47 جىل ەڭبەك ەتكەن اعايىمىز جيىرمادان اسا ادىستەمەلىك قۇرال جازىپ، ستۋدەنتتەرىمىزگە حيميانى يگەرۋدىڭ ناقتى جولىن كورسەتىپ، ءبىلىم الۋشىلارعا مول مۇرا قالدىردى. ابدۋللا مىرزاباي ۇلىنىڭ ەڭبەكتەرى ۋنيۆەرسيتەتىمىزدىڭ كىتاپحاناسىندا ساقتالىپ، ستۋدەنتتەرىمىزدىڭ زەرتتەۋ جۇمىستارىندا قولدانىلۋدا»، – دەدى جاراتىلىستانۋ ينستيتۋتىنىڭ ديرەكتورى گاۋحار بايتاشيەۆا.
QyzPU جاراتىلىستانۋ ينستيتۋتىنىڭ بيولوگيا كابينەتى جانە حيميا مەن گەوگرافيا باعىتىنداعى ءدارىسحانالاردىڭ اشىلۋى ستۋدەنتتەردىڭ ساپالى ءبىلىم الۋىنا، عىلىمي-زەرتتەۋ داعدىلارىن قالىپتاستىرۋىنا جانە كاسىبي قۇزىرەتتەرىن ارتتىرۋىنا زور ىقپال ەتپەك.