2025 جىلعى 17-20 اقپان ارالىعىندا الماتى قالاسىنىڭ بالۋان شولاق اتىنداعى سپورت سارايىندا ۇلى جەڭىستىڭ 80 جىلدىعىنا ارنالعان ۇلتتىق قاۋىپسىزدىك كوميتەتى ءتوراعاسىنىڭ كۋبوگى ءۇشىن ۆويلەيبولدان وتكەن تۋرنيردا شەكارا اكادەمياسىنىڭ قۇراما كومانداسى جۇزدەن جۇيرىك، مىڭنان تۇلپار اتاندى، دەپ حابارلايدى aqshamnews.kz
ءۇش كۇنگە سوزىلعان جارىس تارتىسقا تولى بولدى. بارلىق كوماندالار قىزۋ دايىندىقپەن كەلگەن. ۇلتتىق قاۋىپسىزدىك كوميتەتى ۇيىمداستىرعان سايىسقا باس-اياعى 24 كوماندا قاتىسىپ، 200-دەن استام سپورتشى ونەر كورسەتتى.
سپورتتىق سايىستىڭ اشىلۋ سالتاناتىندا ەلىمىزدىڭ مەملەكەتتىك گيمنى وينالىپ، بارشا قاتىسۋشىلار مەملەكەتتىك تۋعا قاراپ ساپ تۇزەدى. قازىلار ءۇشىن قىزۋقاندى جانكۇيەرلەردىڭ قيقۋىنا ۇلاسقان سايىستا جەڭىمپازداردى انىقتاۋ وڭاي بولمادى. بارلىق كوماندالار كىلەڭ مىقتى ويىنشىلارىن ىرىكتەپ اكەلگەنى سونشالىق، ءار كوماندا ويىنشىلارى نامىستى قولدان بەرمەۋگە تىرىسىپ باقتى. -ايتسە دە، وسى جولى دا ءبىرىنشى ورىندى الامىز دەپ كەلگەن پاۆلودار وبلىسىنداعى ارىپتەستەرىمىزدىڭ سالى سۋعا كەتتى. بۇل جولعى ويىندا شەكاراشىلار باسىم ءتۇسىپ، چەمپيون اتانىپ، جەڭىس تۇعىرىنان كورىندى.
اسىرەسە، د.بەكبايەۆتىڭ سىزىق بويىندا تۇرىپ ۇرعان دوبىنا قارسىلاس كوماندالار ارەڭ توتەپ بەرىپ، ونىڭ ءار ۇرعان دوبى كومانداسىنا ۇپاي بولىپ جينالدى. ال اعايىندى اسحاتوۆتاردىڭ تور سەتكانىڭ ماڭىندا تۇرىپ كەزەك-كەزەك ۇرعان دوپتارى كوزدەگەن جەرلەرىنە ءدال ءتۇسىپ كوماندانىڭ ۇپايىن ەسەلەي ءتۇستى. مۇنداي ادەمى كورىنىستى ا.پريششەپا مەن ي.بىسكو دا ادام قىزىعاتىنداي سوققىلار جاساپ زال تولى كورەرمەندەردىڭ كوڭىلىنە قۋانىش ۇيالاتتى. قارسىلاستار تاراپىنان ۇرعان دوپتى الاڭعا تۇسىرمەۋگە تىرىسقان س.ابدينۋروۆ پەن ا.سيدورەنكو رەتى كەلگەندە شابۋىلعا شىعىپ كۇشتى ويىن ورنەكتەرىن كورسەتتى. كوماندا جەتەكشىسى م.رامازانوۆ ءار ويىن بارىسىن قاداعالاپ، كاسىبي جەتەكشىلىك ەتە ءبىلدى.
كوماندالار ب ا ق سىناعان سايىستا وسالى بولمادى. ءار وڭىردەگى دەپارتامەنتتەردەن ىرىكتەلگەن كوماندا ويىنشىلارى سايىستى تارتىستى وتكىزىپ، ويىننىڭ كوركىن قىزدىرا ءتۇستى. ويىن كەزىندە الا دوپتى الاقانىندا ويناتاتىن شەكاراشىلار تالاي بايراقتى باسەكەدە ب ا ق سىناپ جۇرگەن كىل مىقتىلاردان قۇرالعان بولاتىن. ولاردىڭ قۇرامىندا: م.رامازانوۆ، ا.سيدورەنكو، س.ابدينۋروۆ، ۆ.يساەيەۆ، ب.مالكايداروۆ، ا.اسحاتوۆ، د.اسحاتوۆ، ا.پريششەپا، د.بەكبايەۆ، ي.بىسكو بار. اتالعان ويىنشىلاردىڭ بارلىعى سپورت دەسە ىشكەن اسىن جەرگە قوياتىن مىقتىلار. ءبىر سوزبەن ايتقاندا كاسىبي سپورت شەبەرلەرى.
«بالاسى بايەگەگە شاپسا، اناسى ۇيدە وتىرىپ تاقىمىن قىسادى»،- دەمەكشى، ارىپتەستەرىنىڭ ءار قيمىلىن ءجىتى باقىلاپ وتىرعان شەكارا اكادەمياسىنىڭ پروفەسسورلىق-وقىتۋشىلىق قۇرامى مەن 3-وقۋ ديۆيزيون كۋرسانتتارى ويىن بىتكەنشە تىكەسىنەن تىك تۇرىپ، شاپالاقتى ۇرىپ تۇرىپ قولداۋ كورسەتتى. ءوز كەزەگىندە شەكارا اكادەمياسىنىڭ ءانۇرانىن شىرقاپ، ويىنشىلارعا رۋحتىق قولداۋ كورسەتە ءبىلدى.
قالاي ايتساق تا، ءوزارا ب ا ق سىناسقان سپورت ساڭلاقتارىنىڭ جارىسى جوعارى دەڭگەيدە ءوتتى. ءىس-شارانىڭ باستى ماقساتى دا وسى بولعان. سالاۋاتتى ءومىر سالتىن ناسيحاتتاپ، ءار وبلىستا ورنالاسقان ۇلتتىق قاۋىپسىزدىك كوميتەتىنىڭ دەپارتامەنت قىزمەتكەرلەرىنىڭ شەبەرلىگىن شىڭداۋ ەدى.
مەملەكەت باسشىسى قاسىم-جومارت توقايەۆ بۇقارالىق سپورتتى دامىتۋعا ەرەكشە كوڭىل بولۋدە. بۇگىنگى 3 كۇنگە سوزىلعان تارتىستى سايىس سونىڭ ايقىن دالەلى. ۇلتتىق قاۋىپسىزدىك كوميتەتىنىڭ ۇجىمى ۇيىمداستىرعان ۆولەيبول جارىسىنان شەكارا اكادەمياسىنىڭ قۇراما كومانداسى 1-ورىن، سولتۇستىك قازاقستان وبلىسىنان ات تەرلەتىپ كەلگەن كوماندا 2-ورىن، وزدەرىنە قاتتى سەنىم ارتىپ كەلگەن پاۆلودار وبلىسىنان كەلگەن كوماندا ويىنشىلارى 3-ورىنعا تۇراقتادى.
جەڭىس بار جەردە جەڭىلىس بار دەمەكشى، جەڭىلىستىڭ اششى ءدامىن تاتقان كوماندالار دا بولدى. ولاردىڭ جاقسى ويىن ورنەكتەرىن كورسەتكەن ويىنشىلارىنا ۇقك ءتوراعاسىنىڭ ورىنباسارى گەنەرال-مايور ا.نايمانتايەۆ ءارتۇرلى نوميناسيا بويىنشا ماقتاۋ گراموتالار مەن سىيلىقتاردى سالتاناتتى تۇردە تابىستادى.