الماتىدا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ دەپارتامەنتى ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسە وتىرىپ، "ادال ءبىلىم – ادال ۇرپاق" اتتى قالالىق فورۋم وتكىزدى. ءبىلىم بەرۋ جۇيەسىندە ادالدىق مادەنيەتىن قالىپتاستىرۋعا باعىتتالعان فورۋم جۇمىسىنا مەملەكەتتىك ورگانداردىڭ وكىلدەرى، ءبىلىم بەرۋ ۇيىمدارىنىڭ باسشىلارى، سالا ساراپشىلارى مەن قوعام قايراتكەرلەرى قاتىستى.
ءىس-شارا بارىسىندا "ادال ءبىلىم" جانە "ادال ۇرپاق" باستامالارىن جۇزەگە اسىرۋدىڭ ماڭىزدىلىعى اتاپ ءوتىلدى. قاتىسۋشىلار جاستاردىڭ قۇندىلىقتىق باعدارلارىن قالىپتاستىرۋ، وتباسىلىق تاربيەنىڭ ءرولىن كۇشەيتۋ جانە الماتى قالاسىنىڭ ءبىلىم بەرۋ ۇيىمدارىندا ەنگىزىلىپ جاتقان ءتيىمدى تاجىريبەلەر جونىندە پىكىر الماستى.
فورۋم جۇمىسىن مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنت باسشىسى ەركەبولات نۇرجىگىتوۆ اشتى. ول كەزەكتى باسقوسۋدىڭ ءبىلىم بەرۋ جۇيەسىندەگى پاراساتتىلىق پەن ادالدىق مادەنيەتىن قالىپتاستىرۋعا ارنالعانىن باسا ايتتى.
"ءبىز جاستار مەن بالالاردىڭ بويىنداعى ادىلدىك، اشىقتىق جانە جاۋاپكەرشىلىك سياقتى قۇندىلىقتاردى قالاي دارىتۋ كەرەكتىگىن تالقىلايمىز. ءىس-شاراعا مەملەكەتتىك ورگان وكىلدەرى، ءبىلىم بەرۋ سالاسىنىڭ ماماندارى، ستۋدەنتتەر جانە ۇكىمەتتىك ەمەس ۇيىمداردىڭ وكىلدەرى قاتىسۋدا. جالپى، ءبىزدىڭ دەپارتامەنت مۇنداي اۋقىمدى شارانى العاش رەت وتكىزىپ وتىر. دەگەنمەن الداعى ۋاقىتتا وسىنداي ءىس-شارالار ءجيى-جيى وتكىزۋدى جوسپارلاپ وتىرمىز. مۇندا ءبىز كوتەرىپ وتىرعان نەگىزگى ماسەلە – ادال ۇرپاقتى تاربيەلەۋ تاسىلدەرىن قاراستىرۋ"، – دەدى.
ول سونىمەن قاتار، سىبايلاس جەمقورلىققا قارسى كوزقاراستى قالىپتاستىرۋ ءبىرىنشى كەزەكتە وتباسىنان باستالىپ، كەيىن مەكتەپ جانە جوعارى وقۋ ورىندارىندا جالعاسۋى كەرەك ەكەنىن اتاپ ءوتتى. بىلايشا ايتقاندا، سىبايلاس جەمقرلىققا قارسى كۇرەس ءبىر كەزەڭدەگى قوعامدىق ناۋقاننان كورى ازاماتتاردىڭ بويىنداعى ورتاق قۇندىلىققا اينالۋى ماڭىزدى دەپ سانايتىنىن جەتكىزدى.
فورۋمدا ءبىلىم بەرۋ سالاسىندا ادالدىق مادەنيەتىن دامىتۋداعى باسىم باعىتتار مەن قولدانىلىپ جاتقان تاسىلدەر تۋرالى بايانداما تىڭدالىپ، جۇرگىزىلىپ جاتقان جۇمىستاردىڭ ناتيجەلەرى مەن الداعى مىندەتتەر ورتاعا سالىندى. جيىن قورىتىندىسىندا ءبىلىم بەرۋ جۇيەسىندەگى اشىقتىق پەن پاراساتتىلىقتى نىعايتۋعا باعىتتالعان كەشەندى جۇمىستاردىڭ ماڭىزدىلىعى ءار قىرىنان تالقىلاندى.
ءىس-شارا "ادال ءبىلىم" جانە "ادال ۇرپاق" باستامالارىن جۇزەگە اسىرۋدىڭ ماڭىزدىلىعىن ءتىپتى دە ايقىنداي ءتۇستى. وسى باعىتتا جاستاردىڭ قۇندىلىقتىق باعدارلارىن قالىپتاستىرۋ، وتباسىنىڭ ءرولىن كۇشەيتۋ جانە الماتى قالاسىنىڭ ءبىلىم بەرۋ ۇيىمدارىندا ەنگىزىلىپ جاتقان ءتيىمدى تاجىريبەلەر دە وسى ورتانىڭ كەڭ تاقىرىپتىق تالقىسىندا بولدى. الماتى قالاسى بويىنشا دادگس باسشىسى گۇلنار ەرمەكبايەۆا فورۋمداعى بايانداماسىندا ءبىلىم بەرۋ سالاسىندا ادالدىق مادەنيەتىن دامىتۋ باعىتىنداعى باسىمدىقتار مەن تاسىلدەر تۋرالى تەرەڭ تالداۋىن ۇسىندى. فورۋم سوڭىندا سىبايلاس جەمقورلىققا قارسى ءىس-شارالار اياسىندا ىنتىماقتاستىق تۋرالى مەموراندۋمعا قول قويدى.
"جالپى، "ادال ۇرپاق" تاربيەسى باعىتىن پرەزيدەنتىمىز قاسىم-جومارت كەمەل ۇلى ءوزىنىڭ حالىققا ارناعان جولداۋىندا بىرنەشە رەت توقتالدى. قازىرگى تاڭدا بۇل باعىتتا جاستار ۇيىمدارىندا، جوعارى وقۋ ورىندارى مەن مەكتەپتەردە اۋقىمدى جۇمىستار جۇرگىزىلىپ جاتىر. حالىقارالىق سىبايلاس جەمقورلىققا قارسى كۇرەس كۇنى اياسىندا ءوتىپ جاتقان فورۋم قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتىنىڭ ۇيىمداستىرۋىمەن وتۋدە. ءبىز بۇل باسقوسۋعا بارلىق مەملەكەتتىك ەمەس ۇيىمدار مەن قوعام بەلسەندىلەرىن جيناپ، "ادال قوعام – ادال ۇرپاق" تاقىرىبىندا وي بولىستىك. الماتى قالاسى بويىنشا "الماتى. ادالدىق الاڭى" جوبالىق كەڭسەمiز جۇمىس ىستەيدى. سونىمەن قاتار، "ادال ۇرپاق" جانە "سىبايلاس جەمقورلىقسىز بولاشاق" جوبالارى دا ىسكە اسىپ جاتىر. بۇل جۇمىستاردىڭ بارلىعى الماتى قالاسىنىڭ ىشكى ساياسات باسقارماسى مەن اگەنتتىكتىڭ تىكەلەي قولداۋىمەن جۇرگىزىلۋدە. ءبىزدىڭ جۇمىسىمىزدىڭ ەڭ باستى ماقساتى – جاستار اراسىندا سىبايلاس جەمقورلىققا قارسى مادەنيەتتى قالىپتاستىرۋ. وسى ماقساتتا ءبىز فورۋمدار، كونفەرەنسيالار، دوڭگەلەك ۇستەلدەر وتكىزىپ، جاستارمەن كەزدەسۋلەر ۇيىمداستىرامىز. سونىمەن قاتار، بەينەروليكتەر كورسەتىپ، ادال قىزمەتىمەن ەلگە ەڭبەگى سىڭىرگەن ارداگەرلەرمەن كەزدەسۋلەر ۇيىمداستىرامىز. ارينە، جۇرگىزىلىپ جاتقان اقپاراتتىق جۇمىستاردىڭ ءوز ناتيجەسىن بەرىپ جاتقانىن ايتقىم كەلەدى"، - دەدى "پاراساتتى ۇرپاق ءۇشىن" قوعامدىق قورىنىڭ پرەزيدەنتى، الماتى قالاسى بويىنشا "ادالدىق الاڭى" جوباسىنىڭ جەتەكشىسى مارات قاليمولدين.