2025 جىلى الماتىدا ۇزىندىعى 5،7 شاقىرىم بولاتىن اۋماعى 23،4 گەكتار ۇلكەن الماتى وزەنى جاعالاۋىن كورىكتەندىرۋ جۇمىستارى باستالادى. بۇل تۋرالى قالانىڭ ءۇش جىلدىق بيۋدجەتى بەكىتىلگەن ءماسليحاتتىڭ كەزەكتەن تىس سەسسياسىندا بەلگىلى بولدى، دەپ حابارلايدى aqshamnews.kz
جوبا بەتوندى تىرەۋىش قۇرىلىمداردى قايتا جوندەۋ، جاياۋ جۇرگىنشىلەر مەن ۆەلوسيپەد جولدارىن سالۋ، كوپىرلەر، جارىقتاندىرۋ تىرەكتەرى، بەينەباقىلاۋ كامەرالارى، بالالار مەن سپورت الاڭدارى، دەمالىس ورىندارى جانە مودۋلدىك قوعامدىق دارەتحانالار ورناتۋدى قامتيدى. سونداي-اق اۋماقتى كوگالداندىرۋ جانە باقىلاۋ الاڭدارىن جاساۋ جوسپارلانعان.
ايتا كەتسەك، 2024 جىلى الماتىنىڭ الاتاۋ اۋدانىنداعى بورالداي وزەنى بويىندا 24 گەكتار اۋماقتا جاسىل ايماق قۇرۋ جۇمىستارى اياقتالعان بولاتىن. وندا جاياۋ جۇرگىنشىلەر كوپىرى، سكەيتپارك، بالالار جانە سپورت الاڭدارى جابدىقتالىپ، ورىندىقتار، قوقىس جاشىكتەرى مەن مودۋلدىك دارەتحانالار ورناتىلدى. مۇنداي جوبالاردىڭ تاجىريبەسى كورىكتەندىرىلگەن جاعالاۋلار مەن جاسىل ايماقتاردىڭ دەمالۋعا قولايلى ورىنعا اينالىپ، قالالىق ورتانىڭ ساپاسىن ارتتىراتىنىن كورسەتەدى.