الماتىدا رەسپۋبليكا كۇنى قارساڭىندا جانە حالىقارالىق نان كۇنى مەن حالىقارالىق اسپازدار كۇنىنە وراي ۇلتتىق ءدام-تاعامدارىمىزدى ناسيحاتتاۋ ماقساتىندا «باۋىرساق fest» V قالالىق فەستيۆالى ءوتتى.
الماتى سەرۆيستىك قىزمەت كورسەتۋ كوللەدجىندە ۇيىمداستىرىلعان فەستيۆال سالت-داستۇرلەرىمىز بەن مادەنيەتىمىزدى – ۇرپاقتان-ۇرپاققا جالعاسىپ كەلە جاتقان رۋحاني مۇرامىزدى ۇمىتپاي، بۇگىنگى زامانعا ساي دامىتىپ، جالعاستىرىپ وتىرۋعا ۇندەيدى.
«باۋىرساق fest» V قالالىق فەستيۆالىنە جينالعان مەيماندار، ستۋدەنتتەر داستارحان ۇستىنە قويىلعان مول باۋىرساقتان ءدام تاتتى. ال وعان قاتىسقان ماماندار ءبىر عانا ۇن ونىمىنەن باۋىرساق، شەلپەك ءپىسىرىپ قانا قويماي، «التى قاناتتى اق وردانى»، «اق سالدەلى اتانى»، «اق كيمەشەكتى اجەنى»، جايلاۋ توسىندەگى ءتورت تۇلىك مالدىڭ بەينەسىن دە، ءتىپتى تەربەتىلىپ تۇرعان التىباقاندى دا «پىسىرگەن». كاسىبي شەبەرلىككە، شەكسىز فانتازياعا «بارەكەلدى» دەمەسكە امالىڭ دا قالمايدى.
فەستيۆالدە الماتى قالاسىنداعى كوللەدجدەردىڭ وقىتۋشىلارى 3 نوميناسيا بويىنشا سايىسقا ءتۇسىپ، «ءداستۇرلى باۋىرساق»، «شي باۋىرساق»، «اۆتورلىق باۋىرساق» ءپىسىردى. ولاردىڭ باۋىرساقتارىن كاسىبي ناۋبايحانا جانە كونديتەرلىك تەحنولوگتاردان تۇراتىن قازىلار القاسى باعالادى.
فەستيۆال قورىتىندىسىندا «ءداستۇرلى باۋىرساق» نوميناسياسىندا جەڭىسكە جەتكەندەر: 1-ورىن – اراي الماسبەك (تۋريزم جانە قوناقجايلىلىق يندۋسترياسى كوللەدجى)، 2-ورىن – گۇلدانا يسەنبايەۆا (الماتى وبلىسىنىڭ قىزمەت كورسەتۋ جانە تاماقتاندىرۋ سالاسىنداعى يننوۆاسيالىق تەحنولوگيالار كوللەدجى)، 3-ورىن – كامشات شالدانبايەۆا (الماتى ءسان جانە ديزاين كوللەدجى).
«شي باۋىرساق» جۇلدەگەرلەرى: 1-ورىن – نازگۇل قۇرمانعازى (الماتى سەرۆيستىك قىزمەت كورسەتۋ كوللەدجى)، 2-ورىن – فاريدا المەنوۆا (الماتى ءسان جانە ديزاين كوللەدجى)، 3-ورىن – ايگەرىم ءنۇسىپوۆا (الماتى مەملەكەتتىك بيزنەس كوللەدجى).
ال «اۆتورلىق باۋىرساق» نوميناسياسىندا قۋانىشقا بولەنگەندەر: 1-ورىن – دينارا كۇلتايەۆا (الماتى تەحنولوگيالىق-ەكونوميكالىق كلللەدجى)، 2-ورىن – اياۋجان بولات (الماتى سەرۆيستىك قىزمەت كورسەتۋ كوللەدجى)، 3-ورىن – ايگەرىم ديحانوۆا (الماتى مەملەكەتتىك بيزنەس كوللەدجى).
تابەتتى اشار نان ونىمدەرى قويىلعان ەرەكشە «Art ستول» نوميناسياسىنىڭ جۇلدەگەرلەرى: 1- ورىن – ەلميرا مالدىبايەۆا، ۇلبالا داۋىتبەك، اقنۇر قۋاندىقوۆا (الماتى وبلىسىنىڭ قىزمەت كورسەتۋ جانە تاماقتاندىرۋ سالاسىنداعى يننوۆاسيالىق تەحنولوگيالار كوللەدجى)، 2-ورىن – گۇلجان يمانقۇلوۆا، ءامينا ەرجان، ارۋجان قوجابەك (الماتى سەرۆيستىك قىزمەت كورسەتۋ كوللەدجى)، 3-ورىن – ولەسيا وتەنكو، بوتا قاناپيانوۆا، اياۋلىم قۋانىش (تۋريزم جانە قوناقجايلىلىق يندۋسترياسى كوللەدجى).
«باۋىرساق» فەستيۆالىنىڭ سوڭى مەرەكەلىك كونسەرتكە ۇلاستى.
ەرۇلان قاراعۇلوۆ، الماتى سەرۆيستىك قىزمەت كورسەتۋ كوللەدجىنىڭ ديرەكتورى:
– «باۋىرساق» فەستيۆالىن ەڭ العاش وسىدان بەس جىل بۇرىن ۇيىمداستىرعان ەدىك. ول كەزدە تەك ءوز ىشىمىزدە وتكىزەتىنبىز. مىنە، كورىپ وتىرسىزدار، بيىل اياسى كەڭەيىپ، قالاداعى وزگە كوللەدجدەر ۇجىمى دا قاتىسىپ، ونەرلەرىن ورتاعا سالىپ جاتىر. بۇل فەستيۆالگە 100-دەن استام پەداگوگ، وقۋشىلار قاتىسۋعا نيەت ءبىلدىردى. الماتى قالالىق اكىمدىگىنىڭ، قالالىق ءبىلىم باسقارماسىنىڭ قولداۋىمەن فەستيۆالدىڭ مارتەبەسىنىڭ بيىكتەگەنىنە ءبىز دە مارقايىپ قالدىق. ءبىز قازاقتىڭ قوناقجاي بولمىسىن ناسيحاتتاعىمىز كەلەدى، وسى سالادا جۇرگەن ارىپتەستەرگە بىر-بىرىمەن تاجىريبە الماسۋعا مۇمكىندىك جاساعىمىز كەلەدى. سول ارقىلى اسپاز ماماندىعىنىڭ مارتەبەسىن كوتەرىپ، جاستارعا ۇلگى بولىپ، ولاردى ەڭبەكقورلىققا باۋلۋ –باستى ماقساتىمىز.