Almaty Tourism Bureau قالانىڭ باستى كورىكتى جەرلەرى بويىنشا تەگىن ۆيرتۋالدى 3D-تۋر ازىرلەدى. ەندى جوعارى ساپالى سيفرلىق كوشىرمەلەردىڭ ارقاسىندا ۇيدەن شىقپاي-اق تۋريزم نىساندارىنا بارۋعا بولادى. ۆيرتۋالدى تۋر الماتىنى حالىقارالىق دەڭگەيدە تۋريستىك دەستيناسيا رەتىندە تانىمال ەتۋگە باعىتتالعان، دەپ حابارلايدى almaty-akshamy.kz
«ءبىز ينتەراكتيۆتى ەكسكۋرسيا جاساعىمىز كەلدى، سوندىقتان كومپيۋتەرلىك ءتىنتۋىردىڭ كومەگىمەن ءسىز تولىق ەكسكۋرسيا جاساي الاسىز، كورەرمەنگە «قاتىسۋ اسەرىن» جاساي وتىرىپ، ول جەردىڭ كەز كەلگەن نۇكتەسىندە وتىرىپ، بارىنشا تولىق اقپاراتتى الا الادى. مىسالى، كۋرسوردى اۋەزوۆ اتىنداعى قازاق ۇلتتىق دراما تەاترىنىڭ ساحناسىنا اپارىپ، وندا بۇرىن قانداي قويىلىمدار وتكەنىن كورۋگە بولادى. مۇنداي ۆيرتۋالدى تۋرلار تەك ورىندار تۋرالى اقپاراتتاندىرىپ قانا قويماي، سونىمەن قاتار ەكسكۋرسيالىق-تۋريستىك كورسەتۋ نىساندارىمەن كورنەكى تانىسۋ شەكاراسىن كەڭەيتۋگە مۇمكىندىك بەرەدى»، – Almaty Tourism Bureau باسشىسى كاميلا لۇكپانوۆا اتاپ ءوتتى.
بۇگىندە ءتورت 3D تۋرى قۇرىلدى، ولاردى VisitAlmaty.kz. سايتىنان تابۋعا بولادى. قول جەتىمدى تۋرلاردىڭ ىشىندە د.ا. قونايەۆ مەموريالدىق پاتەر-مۋزەيى، قازاقتىڭ ۇلى جازۋشىسى م. اۋەزوۆتىڭ ادەبي-مەموريالدىق ۇي-مۋزەيىنە ۆيرتۋالدى ساياحات جاساۋعا، سونداي-اق اباي قازۇوبت-عا جانە اۋەزوۆ اتىنداعى قازاق ۇلتتىق دراما تەاترىنا بارۋعا بولادى.
ۆيرتۋالدى ساياحاتتى باستاۋ ءۇشىن تەك ءبىر قادام جاساۋ جەتكىلىكتى – كىرە بەرىس ەسىكتى باسىپ، عيماراتتىڭ ىشىنە كىرەسىز. ءتىنتۋىر كۋرسورىن جىلجىتۋ ارقىلى جان-جاققا قاراپ، ءار بولىگىن زەرتتەي وتىرىپ، دالىزدەر ارقىلى العا جىلجي الاسىز. ءاربىر ورىننىڭ اتموسفەراسىنا تولىق ەنۋ ءۇشىن ءۇش تىلدە: قازاق، ورىس جانە اعىلشىن تىلدەرىندە قولجەتىمدى اۋديوگيدتى قوسۋعا بولادى.
اعىمداعى جىلدىڭ قاراشا ايىندا تۋريستەرگە الماتىنىڭ تاعى 9 نىسانى بويىنشا، ونىڭ ىشىندە ق ر ورتالىق مەملەكەتتىك مۋزەيى، رەسپۋبليكا سارايى، قاستەيەۆ اتىنداعى مەملەكەتتىك ونەر مۋزەيى، ىقىلاس اتىنداعى ۇلتتىق مۋزىكالىق اسپاپتار مۋزەيى، الماتى مەتروپوليتەنى، لەرمونتوۆ اتىنداعى مەملەكەتتىك اكادەميالىق ورىس دراما تەاترى، ورتالىق مەشىت، الماتى ۆوزنەسەنسك كافەدرالدى سوبورى جانە بايكەن مەشىتى بويىنشا ۆيرتۋالدى «سەرۋەندەر» قولجەتىمدى بولادى.