الماتىدا ستۋدەنتتەر اراسىنداعى ەڭ تانىمال ALMA CUP 2025 سپورتتىق ءتۋرنيرى اياسىندا باسكەتبولدان فينالدىق ويىندار ءوتتى. تۋرنير الماتى قالاسى جاستار ساياساتى باسقارماسىنىڭ قولداۋىمەن ۇيىمداستىرىلدى.
ALMA CUP 2025 – جاستار اراسىندا سپورت مادەنيەتىن دامىتۋعا، فيزيكالىق دايىندىق دەڭگەيىن ارتتىرۋعا جانە كوماندالىق سپورت تۇرلەرىن، سونىڭ ىشىندە ميني-فۋتبول، باسكەتبول، ۆولەيبول مەن كيبەرسپورتتى ناسيحاتتاۋعا باعىتتالعان الەۋمەتتىك جوبا. ءتۋرنيردىڭ جۇلدە قورى 4 800 000 تەڭگەنى قۇرايدى، ونىڭ ىشىندە 1 600 000 تەڭگە باسكەتبولعا (800 000 تەڭگە – ەرلەر كوماندالارىنا، 800 000 تەڭگە – ايەلدەر كوماندالارىنا).
ايتا كەتەيىك، ALMA CUP 2025 جوباسى اياسىندا، 1-2 ناۋرىز كيبەرسپورتتان تۋرنير وتەدى. ال، ميني-فۋتبول مەن ۆولەيبول تۋرنيرلەرىن ءساۋىر ايىندا وتكىزۋ جوسپارلانۋدا جانە 31 ناۋرىزعا دەيىن ءوتىنىم قابىلداۋ جالعاسادى.
باسكەتبول تۋرنيرىنە الماتىنىڭ 30-دان استام وقۋ ورنىنان 34 كوماندا قاتىستى: 26 ەرلەر جانە 8 ايەلدەر كومانداسى. بىرنەشە اي بويى ستۋدەنتتەر جوعارى دەڭگەيدەگى دايىندىقتارىن، سپورتتىق ىنتا-جىگەرلەرىن كورسەتە وتىرىپ، قالاداعى ەڭ ءىرى ستۋدەنتتىك سپورت جوباسىندا جەڭىسكە جەتۋگە ۇمتىلدى.
شەشۋشى ويىندار ناتيجەسىندە جەڭىمپازدار كەلەسىدەي انىقتالدى:
ەرلەر كومانداسى اراسىندا جەڭىمپازدار تومەندەگىدەي انىقتالدى:
I ورىن – قازستا (قازاق سپورت جانە تۋريزم اكادەمياسى)
II ورىن – حاتۋ (حالىقارالىق اقپاراتتىق تەحنولوگيالار ۋنيۆەرسيتەتى)
III ورىن - «تۇران» ۋنيۆەرسيتەتى
ايەلدەر كاتەگورياسى بويىنشا:
I ورىن – قازستا (قازاق سپورت جانە تۋريزم اكادەمياسى)
II ورىن – قازۇۋ (قازاق ۇلتتىق ۋنيۆەرسيتەتى)
III ورىن – قىزپۋ (قازاق ۇلتتىق قىزدار پەداگوگيكالىق ۋنيۆەرسيتەتى)
جەڭىمپازدار مەن جۇلدەگەرلەر كۋبوكتارمەن، مەدالدارمەن، ماقتاۋ قاعازدارىمەن جانە اقشالاي سىيلىقتارمەن ماراپاتتالدى.
«تۋرنير وتە جوعارى دەڭگەيدە ءوتتى! بارلىق كوماندالار مىقتى دايىندالعان، ويىندار قىزۋ تارتىسقا تولى بولدى. مۇنداي جارىستار سپورتشىلار ءۇشىن ۇلكەن موتيۆاسيا بەرەدى. ALMA CUP بىزگە تەك جەڭىسكە دەگەن قۇلشىنىس ەمەس، جاڭا دوستار، ەرەكشە ەموسيالار سىيلادى. ۇيىمداستىرۋشىلارعا وسىنداي كەرەمەت مۇمكىندىك ءۇشىن ۇلكەن العىس ايتامىن! ءبىزدىڭ كوماندا ءۇشىن بۇل ۇلكەن جەتىستىك، ءارى قاراي دا بيىك بەلەستەردى باعىندىرۋعا دايىنبىز!»، - دەدى ALMA CUP 2025 ءتۋرنيرىنىڭ جەڭىمپازى، قازستا ستۋدەنتى مۇستاجاپ قىزى گءۇلجانار.
الماتى قالاسى جاستار ساياساتى باسقارماسىنىڭ مالىمەتىنشە، 2025 جىلى جاستاردى جان-جاقتى قولداۋ بويىنشا 56 جوبانى جۇزەگە اسىرۋعا جوسپارلانعان. سولاردىڭ ىشىندە بىرنەشە جىلدىڭ ىشىندە قالامىزدىڭ ستۋدەنتتەرى اراسىندا سۇرانىسقا يە بولعان جوبا بۇل - ALMA CUP.
ۇيىمداستىرۋشىلار ءتۋرنيردىڭ بارلىق قاتىسۋشىلارىنا، جاتتىقتىرۋشىلارعا، جانكۇيەرلەرگە مەن سەرىكتەستەرگە ستۋدەنتتىك سپورتتى دامىتۋعا قوسقان ۇلەستەرى ءۇشىن العىس بىلدىرەدى.