الماتىدا ۇلتتىق ۇلاننىڭ 5571 اسكەري ءبولىمىنىڭ اسكەري قىزمەتشىلەرى مەن ارداگەرلەر كەڭەسى تىل ارداگەرى، وتستاۆكاداعى مايور عالىمجان باكەشيەۆ اقساقالعا سالەم بەرە باردى.
سوعىستىڭ «بالالارى» – بۇل بالالىق شاعى ۇلى وتان سوعىسى جىلدارىمەن تۇسپا-تۇس كەلگەن ادامدار. ولار قولىنا قارۋ ۇستاپ مايداندا سوعىسپاسا دا، تاعدىرى سوعىسپەن تىعىز بايلانىستى بولدى. بۇل بالالار اشتىقتى، قارشا بوراعان بومبالاردىڭ قورقىنىشىن، ۇرەيىن باستان وتكەردى. جاقىندارىن سوعىس جالمادى. بالا دا بولسا جەڭىستى جاقىنداتامىز دەپ، بۇقاناسى بەكىمەي جاتىپ تىلدا اۋىر ەڭبەك ەتىپ، قيىنشىلىقمەن ءوستى.
سوعىس باستالعاندا عالىمجان اتا نەبارى التى جاستا ەدى. ونىڭ دا بالالىق شاعىن سوعىس ۇرلاعان بولاتىن. ول دا ەڭبەككە ەرتە ارالاسىپ، اۋىلداعى ەر-ازاماتتاردىڭ ورنىن باستى، انالارىمەن بىرگە تىلدا ەڭبەك ەتە ءجۇرىپ، جەڭىسكە ۇلەس قوستى.
ءقازىر سوعىس جىلعى بالالار تىل ارداگەرلەرىنە تەڭەستىرىلگەن. ويتكەنى ولاردىڭ كوبى كىشكەنتاي جاسىنان مايدانعا كەتكەن ەرەسەكتەردىڭ ورنىن باسىپ، زاۋىتتاردا، كولحوزداردا جۇمىس ىستەدى، ساربازدارعا جىلى كيىم توقىدى. عالىمجان اقساقالعا دا وسى مارتەبە بەرىلگەن. سونىمەن قاتار، عالىمجان ءجۇنىس ۇلى – ۇلتتىق ۇلاننىڭ قارت ارداگەرلەرىنىڭ ءبىرى. ول 1960 جىلدان باستاپ كسرو-نىڭ ىشكى اسكەرىندە ءار ءتۇرلى قىزمەتتەردە بولعان. ىشكى اسكەر باسقارماسىندا ساياسات ءبولىمىنىڭ نۇسقاۋشىسى لاۋازىمىندا زەينەتكە شىققان.
بۇگىندە ۇلتتىق ۇلاندا «جەڭىسكە 100 كۇن قالعاندا» اكسياسى ءجۇرىپ جاتىر. وسى ءىس-شارا اياسىندا سوعىس جانە تىل ارداگەرلەرى ءۇشىن كوپتەگەن يگى ىستەر اتقارىلىپ جاتىر. ۇلاندىقتار عالىمجان اتا مەن قونىسكۇل اپاعا ارنايى اكەلگەن سىيلىقتارىن تابىستاپ، سىرنايلارىمەن ءان سالىپ، قارتتارعا كوتەرىڭكى كوڭىل كۇي سىيلاپ كەتتى.