الماتىدا بالاسىمەن بىرگە ۇرلىق جاساعان كەلىنشەك ۇستالدى

ول الماتىدا بىرنەشە رەت قىلمىس جاساعان جامبىل وبلىسىنىڭ 25 جاستاعى تۇرعىنى بولىپ شىقتى.

الماتى قالاسىندا قىزىمەن بىرگە بالالار ارباسىن ۇرلاپ جۇرگەن جاس كەلىنشەك ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

قالالىق پوليسيا دەپارتامەنتى بەينەباقىلاۋ كامەرالارىنا جازىلعان ۆيدەونى جاريالادى.

وندا حيدجاب كيگەن جاس كەلىنشەك قىزىمەن بىرگە ليفتكە كىرىپ كەلەدى. بالاسى دا ورامال تاققان.

كەلەسى كادردا جالعىز ءوزى بالالاردىڭ ارباسىن يىعىنا اسىپ، شىعىپ بارادى.

پوليسيا اربا ۇرلاپ جۇرگەن كەلىنشەكتى ۇستادى. ول جامبىل وبلىسىنىڭ 25 جاستاعى تۇرعىنى بولىپ شىقتى. الماتىدا بىرنەشە رەت قىلمىس جاساعان. ول تۇرعىن ۇيلەردىڭ كىرەبەرىسىندە تۇرعان بالالار ارباسى مەن سابيلەرگە ارنالعان ۆەلوسيپەدتەردى ۇرلاعانى ءۇشىن ايىپتالىپ وتىر.

«ول ايەل بەينەباقىلاۋ كامەرالارىنان، سونداي-اق، كوزىنشە بىرنەشە رەت قىلمىس جاساعان كىشكەنتاي قىزىنان دا ۇيالمادى. ءقازىر ا.ەسىمدى ازاماتشانىڭ بوتەننىڭ مۇلكىن ۇرلاۋدىڭ 8 دەرەگىنە قاتىسى بار ەكەندىگى دالەلدەندى. قىلمىستىق ەپيزودتاردىڭ ءتىزىمى مۇنىمەن بىتپەۋى دە مۇمكىن. بۇل باعىتتاعى جۇمىستار جالعاسۋدا»، - دەيدى پوليسەيلەر.

قازىرگى كەزدە قىلمىستىق كودەكستىڭ 188-بابى، 2-بولىگى (ۇرلىق، بىرنەشە رەت جاسالعان ارەكەت) بويىنشا سوتقا دەيىنگى تەرگەۋ شارالارى باستالدى.