ولار جولاۋشىلار قۇقىعىن بۇزعان.
قازاقستان ۇكىمەتى جولاۋشىلاردىڭ شاعىمدارىنا بايلانىستى تەكسەرۋ جۇمىستارىن جۇرگىزىپ جاتىر، دەپ حابارلايدى Almaty-akshamy.kz.
قازىرگى ۋاقىتتا قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆتىڭ تاپسىرماسى بويىنشا ازاماتتىق اۆياسيا كوميتەتى «قازاقستاننىڭ اۆياسيا اكىمشىلىگى» اق-مەن بىرلەسىپ، كوپتەگەن رەيستەردىڭ كەشىگۋىنە جانە جولاۋشىلاردان تۇسكەن شاعىمدارعا بايلانىستى تەكسەرۋدى جالعاستىرۋدا.
«تەرگەۋ بارىسىندا اعىمداعى جىلدىڭ 5 ماۋسىمىندا «ەير استانا» كومپانيالار توبىنا كىرەتىن Fly Arystan اۋە تاسىمالداۋشىسىنىڭ الماتى – شىمكەنت باعىتى بويىنشا كس-7105 رەيسى 15 ساعات 10 مينۋتقا كەشىككەنى انىقتالدى. وسى رەيستىڭ جولاۋشىلارىنا ۇشۋدى كۇتۋ كەزىندە «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى» قازاقستان رەسپۋبليكاسى زاڭىنىڭ 86-بابىنىڭ 1-بولىگىندە كوزدەلگەن قىزمەتتەر، اتاپ ايتقاندا، قوناق ۇيدە ورنالاستىرۋ قىزمەتتەرى دۇرىس دەڭگەيدە كورسەتىلمەگەن»، - دەلىنگەن يندۋستريا جانە ينفراقۇرىلىمدىق دامۋ مينيسترلىگى باسپا ءسوز قىزمەتىنىڭ حابارلاماسىندا.
وسىعان بايلانىستى اعىمداعى جىلدىڭ 28 شىلدەسىندە، اۆياكومپانياعا قاتىستى قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 567-بابىنىڭ 2-بولىگىمەن اكىمشىلىك قۇقىقبۇزۋشىلىق تۋرالى حاتتاما جاسالىپ، وعان سايكەس اۆياكومپانياعا 1000 اەك (3 000 063 تەڭگە) كولەمىندە ايىپپۇل سالىندى.
بۇعان دەيىن «ەير استانا» كومپانيالار توبى اعىمداعى جىلدىڭ 7 جانە 21 شىلدەسىندە رەيستى كەشىكتىرۋ كەزىندە جولاۋشىلاردىڭ قۇقىقتارىن بۇزعانى ءۇشىن 1000 اەك (3 000 063 تەڭگە) كولەمىندە ايىپپۇل تۇرىندە اكىمشىلىك جاۋاپكەرشىلىككە تارتىلدى.
جالپى بيىل «ەير استانا» كومپانيالار توبى رەيستىڭ كەشىگۋى كەزىندە جولاۋشىلاردىڭ قۇقىقتارىن بۇزعانى ءۇشىن 9 189 000 تەڭگە كولەمىندە اكىمشىلىك جاۋاپكەرشىلىككە تارتىلدى.
قازىرگى ۋاقىتتا رەيستىڭ كەشىگۋىنە جانە جولاۋشىلار قۇقىقتارىنىڭ بۇزىلۋىنا بايلانىستى تەرگەۋ جالعاسۋدا، قۇقىقبۇزۋشىلىق فاكتىلەرى انىقتالعان جاعدايدا تاسىمالداۋشىلار قازاقستان رەسپۋبليكاسىنىڭ قولدانىستاعى زاڭناماسىنا سايكەس جاۋاپكەرشىلىككە تارتىلادى.