الماتىدا ەرەكشە الەۋمەتتىك قىزمەتتەرگە مۇقتاج بالالارعا ارنالعان №2 قولداۋ كورسەتۋ ورتالىعى عيماراتىنىڭ قايتا جاڭعىرتۋىنا دايىندىق باستالدى. جوندەۋ جۇمىسى كەزەڭىندە تاربيەلەنۋشىلەر ۋاقىتشا №1 ارنايى مەكتەپ-ينتەرناتىنا كوشىرىلدى. بۇل تۋرالى بۇعان دەيىن الماتى قالاسى اكىمىنىڭ ورىنباسارى ازامات قالدىبەكوۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا حابارلاعان بولاتىن.
قازىرگى تاڭدا ورتالىقتا 100 بالا تاربيەلەنۋدە، ولاردىڭ ىشىندە 13ء-ى مەكتەپكە دەيىنگى جاستا، 87ء-سى مەكتەپ وقۋشىلارى.
بۇعان دەيىن مەملەكەت باسشىسىنىڭ تاپسىرماسى اياسىندا ورتالىق عيماراتى تولىق جوندەۋدەن وتەتىنى حابارلانعان ەدى. «ينتەگرا» ج ش س الەۋمەتتىك جاۋاپكەرشىلىك اياسىندا جوندەۋ جۇمىستارىن ءوز ەسەبىنەن جۇرگىزۋگە مىندەتتەمە الىپ، بالالار كوشكەن سوڭ قۇرىلىس-مونتاج جۇمىستارىنا دەرەۋ كىرىسۋگە دايىن ەكەنىن مالىمدەدى.
الماتى قالالىق ءبىلىم باسقارماسىنىڭ باسشىسى سايران سايفەدەنوۆتىڭ ايتۋىنشا، تاربيەلەنۋشىلەردى ورنالاستىرۋ ماسەلەسى ەرەكشە باقىلاۋدا.
«قازىرگى ۋاقىتتا جوندەۋدىڭ جوبالىق-سمەتالىق قۇجاتتاماسى ازىرلەنىپ جاتىر. ونىڭ اياسىندا نەگىزگى عيماراتتى قايتا جاڭارتۋ جانە ەسكى شارۋاشىلىق قۇرىلىستارىن ءىشىنارا بۇزۋ قاراستىرىلعان. سونداي-اق جاڭا اكىمشىلىك كورپۋس سالۋ جوسپارلانعان»، — دەدى ول.
سايران سايفەدەنوۆ اتاپ وتكەندەي، بالالاردى ۋاقىتشا كوشىرۋ ماسەلەسى شەشىلگەن.
«بالالار ۋاقىتشا ورنالاسقان №1 ارنايى مەكتەپ-ينتەرناتى دا ءبىلىم باسقارماسىنىڭ قاراماعىندا. ەكى اپتا بۇرىن مۇندا «جانۇيا» مامانداندىرىلعان ءۇيىنىڭ 90-نان استام تاربيەلەنۋشىسى تۇرعان بولاتىن. بالالاردىڭ يەلىگىندە 1100 شارشى مەتردەن استام اۋماق بار — بۇل 18 بولمە، وندا اعىمداعى جوندەۋ جۇرگىزىلگەن. اپتا سوڭىنا قاراي عيمارات تولىق بوساتىلعاننان كەيىن مەردىگەر ۇيىم قايتا جاڭعىرتۋ جۇمىسىنا كىرىسەدى»، — دەپ ناقتىلادى ول.
ەرەكشە الەۋمەتتىك قىزمەتتەرگە مۇقتاج بالالارعا ارنالعان №2 قولداۋ كورسەتۋ ورتالىعىنىڭ ديرەكتورى جۇلدىز مەڭلىبەكوۆا كوشۋ ۇدەرىسى ۇيىمداسقان تۇردە وتكەنىن اتاپ ءوتتى.
«ءبىزدىڭ ورتالىق ۋاقىتشا قايتا جاڭعىرتۋعا جابىلدى. ول 1962 جىلى سالىنعان، سوندىقتان جوندەۋ جۇمىسى قاجەت ەدى. ءقازىر ءبىز تورايعىروۆ كوشەسىندەگى عيماراتقا كوشتىك. بالالار ريزا: بولمەلەر كەڭ، جارىق، بارلىق جاعداي جاسالعان. بىزگە وسىنداي جاقسى عيمارات ۇسىنعانى ءۇشىن ءبىلىم باسقارماسىنا جانە الماتى اكىمدىگىنە العىس بىلدىرەمىز»، — دەدى ول.
«مۇنداعى جاعداي ۇنايدى: بولمەلەر جاقسى، جايلى. ءبىراق ءبارىبىر ءوز ۇيىمىزگە ورالۋدى كۇتەمىز. كەيبىرىمىز ول جەردە ون جىلدان بەرى تۇرامىز، مەن ءوزىم ءتورت جىلدان بەرى. سول سەبەپتى جوندەۋدىڭ اياقتالۋىن اسىعا كۇتەمىز»، — دەپ ءبولىستى تاربيەلەنۋشىلەردىڭ ءبىرى.
بۇگىندە الماتىدا ەرەكشە ءبىلىم بەرۋ قاجەتتىلىگى بار بالالارعا ارنالعان سەگىز ارنايى مەكتەپ-ينتەرنات جۇمىس ىستەيدى، وندا 2 668 وقۋشى ءبىلىم الادى. ونىڭ ىشىندە 1 794 بالا ينتەرناتتا تۇرادى، ال 874ء-ى ۇيدە وقيدى. بۇدان بولەك، ومىرىندە قيىندىق بولىپ جاتقان كامەلەتكە تولماعاندارعا كومەك كورسەتەتىن ءتورت ۇيىم بار. بۇل مەكەمەلەردە 446 بالا تاربيەلەنىپ جاتىر.
ايتا كەتەيىك، بيىلعى 20 قىركۇيەكتە الماتىدا قۇرىلىس كومپانيالارىنىڭ ءبىرى 6 ملرد تەڭگە قاراجات ەسەبىنەن سالعان جاڭا «جانۇيا» مامانداندىرىلعان كەشەنى اشىلدى. بۇل جوبا الەۋمەتتىك ماسەلەلەردى شەشۋدەگى مەملەكەت پەن بيزنەستىڭ ءتيىمدى سەرىكتەستىگىنىڭ ۇلگىسى بولدى.