الماتى اكىمى دارحان ساتىبالدى ورتالىق ازيا مەن ازەربايجان بويىنشا ۇلىبريتانيانىڭ ساۋدا وكىلى، لورد دجون الدەردايسپەن كەزدەستى.
كەزدەسۋ بارىسىندا تاراپتار ساۋدا-ەكونوميكالىق جانە ينۆەستيسيالىق بايلانىستاردى دامىتۋ، سونداي-اق الماتى مەن ۇلىبريتانيا اراسىنداعى ىسكەرلىك جانە گۋمانيتارلىق ىنتىماقتاستىقتى نىعايتۋ ماسەلەلەرىن تالقىلادى.
دارحان ساتىبالدى اتاپ وتكەندەي، قازاقستان مەن ۇلىبريتانيا اراسىنداعى دوستىق جانە ءوزارا سەنىمگە نەگىزدەلگەن قارىم-قاتىناستارعا 30 جىلدان استى. بۇگىندە بۇل بايلانىستار ناقتى سەرىكتەستىك اياسىندا تابىستى دامىپ كەلەدى.
«2025 جىلدىڭ جەتى ايىندا الماتى مەن ۇلىبريتانيا اراسىنداعى ءوزارا ساۋدا اينالىمى 125 ملن اقش دوللارىن قۇرادى. سونىمەن قاتار تۋريستىك باعىت تا بەلسەندى دامىپ كەلەدى. بيىل الماتىعا ۇلىبريتانيادان كەلگەن تۋريستەر سانى 6 مىڭنان استى، بۇل ەلدى شەتەلدىك 11 نەگىزگى تۋريستىك باعىتتىڭ قاتارىنا ەنگىزدى»، – دەدى قالا اكىمى.
ءوز كەزەگىندە لورد الدەردايس ۇلىبريتانيا تاراپىنان ساۋدا، ءبىلىم، يننوۆاسيا جانە ورنىقتى قالالىق دامۋ سالالارىندا ارىپتەستىكتى كەڭەيتۋگە مۇددەلىلىك بار ەكەنىن اتاپ ءوتتى. ونىڭ ايتۋىنشا، الماتىدا بىرلەسكەن جوبالاردى جۇزەگە اسىرۋعا زور الەۋەت بار.
كەزدەسۋ قورىتىندىسى بويىنشا تاراپتار ءوزارا ىنتىماقتاستىقتى نىعايتۋعا جانە الماتى مەن ۇلىبريتانيا اراسىنداعى سەرىكتەستىكتى دامىتۋعا باعىتتالعان ورتاق جوبالاردى ىسكە اسىرۋعا دايىن ەكەنىن ءبىلدىردى.