الماتى اكىمى دارحان ساتىبالدى «قازاقستان – شۆەيساريا» پارلامەنتتىك دوستىق توبىنىڭ تەڭ ءتوراعاسى، كانتوندار كەڭەسىنىڭ دەپۋتاتى يوزەف ديتلي باستاعان شۆەيساريا پارلامەنتى دەپۋتاتتارى دەلەگاسياسىمەن كەزدەستى.
دەلەگاسيا قۇرامىندا كانتوندار كەڭەسىنىڭ بۇرىنعى ءتوراعاسى فيلليپ لومباردي، كانتوندار كەڭەسىنىڭ دەپۋتاتى ماركو كەزا، ۇلتتىق كەڭەس دەپۋتاتى ەريك نۋسباۋمەر جانە شۆەيساريا كونفەدەراسياسى پارلامەنتىنىڭ باسقا دا وكىلدەرى بولدى.
دارحان ساتىبالدى اتاپ وتكەندەي، الماتى – ەلدىڭ ەڭ ءىرى قارجى جانە ىسكەرلىك ورتالىعى. مۇندا قازاقستانداعى بانك اكتيۆتەرىنىڭ 60 پايىزدان استامى مەن ساقتاندىرۋ نارىعىنىڭ شامامەن 70 پايىزى شوعىرلانعان. قالانىڭ ەكونوميكاسىنىڭ نەگىزىن قىزمەت كورسەتۋ مەن ساۋدا سالاسى قۇرايدى، ال شاعىن جانە ورتا بيزنەس حالىقتى جۇمىسپەن قامتۋدىڭ جانە تابىس ءوسىمىنىڭ نەگىزگى كوزى بولىپ وتىر.
سونداي-اق اكىمنىڭ ايتۋىنشا، 2025 جىلدىڭ قاڭتار–تامىز ايلارىنداعى قورىتىندى بويىنشا الماتى مەن شۆەيساريا اراسىنداعى تاۋار اينالىمى 303 مىڭ اقش دوللار بولدى.
كەزدەسۋ بارىسىندا دەپۋتاتتار تابيعي جاعدايى، ىسكەرلىك بەلسەندىلىگى مەن تۋريزم جانە قارجى تەحنولوگيالارىن دامىتۋ الەۋەتى تۇرعىسىنان الماتىنىڭ لۋگانو قالاسىنا ۇقساستىعىن اتاپ ءوتتى.
كەزدەسۋ قورىتىندىسىندا تاراپتار الماتى مەن شۆەيساريا قالالارى اراسىنداعى ىنتىماقتاستىقتى ودان ءارى نىعايتۋعا، سونىڭ ىشىندە قالالىق ينفراقۇرىلىم، ورنىقتى دامۋ جانە يننوۆاسيا سالالارىندا تاجىريبە الماسۋعا مۇددەلىلىك ءبىلدىردى.