مەگاپوليستە 910 مەكتەپكە دەيىنگى ۇيىم بار.
الماتى بالاباقشالارىندا ورىن تاپشى. بۇگىنگى كۇنى مەكتەپكە دەيىنگى ءبىلىم مەكەمەسىنىڭ كەزەگىندە 42 460 بالا تۇر. بۇل تۋرالى بريفينگ بارىسىندا قالالىق ءبىلىم باسقارماسىنىڭ مەكتەپكە دەيىنگى ءبىلىم بەرۋ ءبولىمىنىڭ باسشىسى ءاليا ساعييەۆا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ سوزىنشە، مەگاپوليستە 910 مەكتەپكە دەيىنگى ۇيىم بار. ونىڭ 193ء-ى - مەملەكەتتىك بولسا، قالعان 717ء-ى - جەكەمەنشىك بالاباقشا.
«قالادا مەكتەپكە دەيىنگى ءبىلىم بەرۋ سالاسىنداعى نەگىزگى پروبلەما - بالاباقاشالارداعى ورىن تاپشىلىعى. ءقازىر 42 460 بالا كەزەكتە تۇر. 2 جاستان 6 جاسقا دەيىنگى بالالاردى مەكتەپكە دەيىنگى تاربيەمەن جانە وقىتۋمەن قامتۋ - 71،9%، 3-6 جاس ارالىعىنداعى بالالاردى وقىتۋمەن قامتۋ - 92،9%»،- دەدى ول.
ايتۋىنشا، قازىرگى ۋاقىتتا جەكەمەنشىك بالاباقشالارعا مەملەكەتتىك ءبىلىم بەرۋ تاپسىرىسى بويىنشا قارجى ءبولىنىپ وتىر.
«610 جەكەمەنشىك بالاباقشادا 38 968 ورىن ورنالاستىرىلعان. ءار بالاعا مەملەكەتتىن 41197 تەڭگە ءبولىنىپ وتىر»،- دەپ اتاپ ءوتتى سپيكەر.
سونىمەن قاتار، ول «جاس قانات» شاعىناۋداندا 280 ورىندىق بالاباقشانىڭ قۇرىلىسى ءجۇرىپ جاتقانىن اتاپ ءوتتى.
«الماتىدا 2023 جىلى مەملەكەتتىك 720 ورىندىق 3 بالاباقشا، 2024 جىلى 5 بالاباقشا، 2025 جىلى 2 مەكتەپكە دەيىنگى ءبىلىم مەكەمەسىنىڭ سالۋ جوسپاردى»،- دەدى ءاليا ساعييەۆا.