الماتىدا 100-دەن استام اۆتوكولىك ەكولوگيالىق نورمالارعا سايكەستىگىنە تەكسەرىلدى
الماتى قالاسىندا ەكولوگيالىق قاۋىپسىزدىكتى قامتاماسىز ەتۋ جانە قورشاعان ورتانى قورعاۋ سالاسىنداعى قۇقىق بۇزۋشىلىقتاردىڭ الدىن الۋ بويىنشا جۇيەلى جۇمىس جالعاسۋدا، - دەپ حابارلايدى Aqshamnews.kz.
مەملەكەت باسشىسىنىڭ "زاڭ مەن ءتارتىپ" قاعيداتىن ىسكە اسىرۋ جانە پروفيلاكتيكا جىلى اياسىندا الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسى قىزمەتكەرلەرى "ەكو الماتى" ج ش س ماماندارىمەن بىرلەسىپ، اۆتوكولىكتەردەن شىعاتىن زياندى زاتتاردى باقىلاۋ بويىنشا رەيدتىك ءىس-شارالار وتكىزدى. 4-5 قازان كۇندەرى جىلجىمالى ەكولوگيالىق زەرتحانا كومەگىمەن زاماناۋي گازتالداعىشتار مەن تۇتىنولشەگىش قۇرىلعىلار ارقىلى اۆتوكولىكتەردىڭ شىعارىندىلارى تەكسەرىلدى.
بارلىعى 131 كولىك قۇرالى تەكسەرۋدەن ءوتتى. ناتيجەسىندە 21 جۇرگىزۋشى رۇقسات ەتىلگەن لاستاۋشى زاتتاردىڭ شەكتى مولشەرىن اسىرعانى ءۇشىن جاۋاپكەرشىلىككە تارتىلدى.
الماتى قالالىق پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆتىڭ ايتۋىنشا، مۇنداي ءىس-شارالار تەك قۇقىق بۇزۋشىلىقتاردى انىقتاۋعا عانا ەمەس، سونىمەن قاتار ازاماتتاردىڭ ەكولوگيالىق مادەنيەتىن جانە ءوز اۆتوكولىكتەرىنىڭ تەحنيكالىق جاعدايىنا دەگەن جاۋاپكەرشىلىگىن قالىپتاستىرۋعا باعىتتالعان.
- شاھار ەكولوگياسى – ءاربىرىمىزدىڭ جاۋاپكەرشىلىگىمىز. ءبىزدىڭ ماقساتىمىز – تەك بۇزۋشىلىقتاردى انىقتاۋ ەمەس، ولاردى بولدىرماۋ، زاڭعا باعىنۋ جانە ءوز قالامىزعا ۇقىپتى قاراۋ مادەنيەتىن قالىپتاستىرۋ، – دەدى، تيمۋر نوعايبايەۆ.