دەپۋتات اسحات ايماعامبەتوۆ مۇعالىمدەرگە قاتىستى ماڭىزدى جاڭالىقتى ءبولىستى، - دەپ حابارلايدى Aqshamnews.kz.
ونىڭ ايتۋىنشا، پەداگوگتاردىڭ قۇقىقتارىن قورعاۋعا باعىتتالعان جاڭا زاڭ جوباسى ازىرلەنىپ، ۇكىمەتكە جولداندى.
جاڭا قۇجاتتا پەداگوگتاردىڭ كاسىبي مىندەتىنە جاتپايتىن جۇمىستاردان بوساتىلۋى ناقتى قاراستىرىلعان.
"ءمۇعالىمنىڭ باستى جۇمىسى – ءبىلىم بەرۋ. ول موبيلوگراف، بلوگەر، كۇزەتشى نەمەسە چات مودەراتورى بولماۋى كەرەك"، – دەپ اتاپ ءوتتى دەپۋتات.
نەگىزگى وزگەرىستەر قانداي؟
ارتىق ەسەپكە – توقتام. قاعاز نەمەسە سيفرلىق ەسەپتىڭ تەك ءبىر ءتۇرى عانا تولتىرىلادى. ءبىر جۇيەگە ەنگىزىلگەن مالىمەت بىرنەشە پلاتفورمالاردا قايتالانباۋى ءتيىس.
ءمۇعالىم بلوگەر بولۋعا مىندەتتى ەمەس. پوست جازۋ نەمەسە الەۋمەتتىك جەلى جۇرگىزۋ – تەك ءمۇعالىمنىڭ ەركىمەن.
چاتتار مەن حابارلامالارعا شەكتەۋ. حابار الماسۋ تەك رەسمي LMS پلاتفورمالار مەن ەلەكتروندى پوشتا ارقىلى جۇرگىزىلۋى ءتيىس. ءمۇعالىم تاۋلىك بويى چاتتا وتىرمايدى.
مەكتەپتەن تىس جاعدايعا ءمۇعالىم جاۋاپ بەرمەيدى. ول كۇزەتشى دە، تەرگەۋشى دە ەمەس.
"مۇعالىمگە ءتان ەمەس فۋنكسيالار" ۇعىمى زاڭمەن بەكىتىلەدى. ياعني ەڭبەك كەلىسىمشارتىندا كورسەتىلمەگەن مىندەتتەردى جۇكتەۋگە تىيىم سالىنادى.
اتا-انا مەن مەكتەپ اراسىنداعى كەلىسىمنىڭ مارتەبەسى ارتادى. بارلىق تاراپتار تاربيە ىسىندە ورتاق جاۋاپكەرشىلىك الۋى ءتيىس.
ءمۇعالىم مارتەبەسىن بۇزعاندارعا ايىپپۇل كۇشەيەدى.
فيزيكالىق جانە پسيحولوگيالىق زورلىققا – نولدىك ءتوزىم. زاڭ جوباسىندا پەداگوگقا قىسىم كورسەتۋگە مۇلدەم تىيىم سالىناتىن ارنايى نورما ەنگىزىلگەن.
اسحات ايماعامبەتوۆ بۇل باستامانىڭ ءمۇعالىم مارتەبەسىن ارتتىرۋعا جانە ءبىلىم بەرۋ سالاسىنداعى ادىلەتتىلىكتى نىعايتۋعا باعىتتالعانىن اتاپ ءوتتى.