ءىس-قيمىل جوسپارى ەكى كەزەڭگە ءبولىندى. ءبىرىنشىسى كەزەندە جامبىل، الماتى، اقمولا، باتىس قازاقستان وبلىستارىندا 1،7 تەكشە كيلومەتر سۋدى جيناقتايتىن 8 سۋ قويماسىن سالۋ جوسپارلانعان. 



«ەكىنشى كەزەڭدە اقتوبە، قىزىلوردا، شىعىس قازاقستان جانە قاراعاندى وبلىستارىندا 12 سۋ قويماسىن سالۋ كوزدەلگەن. بۇدان باسقا، 15 گيدروتەحنيكالىق قۇرىلىستى قايتا جاڭعىرتۋ جوسپارلانعان. جوبالىق-سمەتالىق قۇجاتتاما ازىرلەنۋ ۇستىندە»، - دەدى مينيستر.



نۇرجان نۇرجىگىتوۆ سۋدىڭ «قارا نارىعىن» جويۋ جونىندەگى شارالار كۇشەيتىلەتىنىن اتاپ كورسەتتى. سونىڭ ىشىندە سۋ سالاسىنداعى بۇزۋشىلىقتار ءۇشىن جاۋاپكەرشىلىكتى زاڭنامالىق دەڭگەيدە قاتاڭداتۋ قاراستىرىلعان.



«سۋ كودەكسىنىڭ جاڭا رەداكسياسىندا باسسەيندىك سۋ ينسپەكسيالارىنا مەملەكەتتىك باقىلاۋ فۋنكسيالارىنان بولەك قاداعالاۋ فۋنكسيالارى دا بەرىلەدى. كاسىپكەرلىك كودەكس سۋ رەسۋرستارىن باسقارۋ ورگاندارى جەدەل دەن قويۋ شارالارىن قابىلداي الاتىن نورمالارمەن تولىقتىرىلادى. تاجىريبە كورسەتكەندەي، سۋدى ءوز بەتىنشە پايدالانۋ بولىگىندە سۋ زاڭناماسىنىڭ بۇزىلۋىنا جەدەل دەن قويۋ تەتىكتەرىنىڭ بولماۋى، جەكەلەگەن سۋ تۇتىنۋشىلاردىڭ بەلگىلەنگەن سۋ الۋ ليميتتەرىنەن اسىپ كەتۋىنەن سۋمەن قامتاماسىز ەتۋ پروبلەمالارى تۋىنداعان»، - دەپ ءتۇسىندىردى ۆەدومستۆو باسشىسى.