الماتىدا جاڭا جىلدان باستاپ اۋلا اۋماقتارىنىڭ ستاندارتتارىن ەنگىزۋ جوسپارلانۋدا، دەپ حابارلايدى Almaty-akshamy.kz
اۋلا اۋماقتارىن جايلى قالا ستاندارتتارىنا سايكەس رەتكە كەلتىرۋ قاجەت. ءقازىر ساۋلەتشىلەر مەن ۋربانيستەر جۇمىسقا كىرىستى.
بۇل تۋرالى الماتى اكىمى ەربولات دوسايەۆ بوستاندىق اۋدانى تۇرعىندارىنىڭ سۇراقتارىنا جاۋاپ بەرگەن كەزدە ايتتى.
«ءبىز وسى ستاندارتتاردى ەرەجە رەتىندە بەكىتكىمىز كەلەدى. ءقازىر زاڭ بويىنشا الدىڭعى جۇرگىزىلگەن جۇمىستارعا بەس جىل تولمايىنشا اۋلادا ءتىپتى كىشىگىرىم جۇمىستى دا جۇرگىزۋگە بولمايدى. ەگەر بۇل نورما الىنىپ تاستالسا، وندا بۇل ۋاقىتتى جوعالتپاي، اعىمداعى جوندەۋ جۇمىستارىن جۇرگىزۋگە بولادى، ياعني ءبىز ۇنەمى جۇمىس ىستەي الامىز»، - دەپ اتاپ ءوتتى ەربولات دوسايەۆ.
اۋلا الاڭدارىن اباتتاندىرۋ كەزىندە حالىقتىڭ مۇمكىندىگى شەكتەۋلى توپتارىنىڭ ءجۇرىپ-تۇرۋىنا ىڭعايلى بولۋ ءۇشىن ينكليۋزيۆتى ورتا قۇرۋعا ەرەكشە نازار اۋدارىلادى. بۇل رەتتە جىلدىڭ كەز كەلگەن ۋاقىتىندا جانە كەز كەلگەن اۋا رايى جاعدايىندا قالا تۇرعىندارىنا جايلى بولۋ ءۇشىن بارلىق بالالار الاڭدارى مەن ۆوركاۋت-ايماقتاردا ارنايى شاتىرلاردى ورنالاستىرۋ قاراستىرىلادى.
سونىمەن قاتار، جاڭا ستاندارتتارعا سايكەس اۋلا اۋماقتارىن مىندەتتى تۇردە كوگالداندىرۋ جانە ت. ب. جوسپارلانۋدا.