الماتىدا ارىق جەلىلەرى جاڭارتىلىپ جاتىر

الماتىدا قالا اكىمىنىڭ تاپسىرماسىمەن سۋ باسۋدى جويۋ ءۇشىن ارىق جەلىلەرى جاڭارتىلىپ جاتىر، Almaty-akshamy.kz

 بوستاندىق اۋدانىنىڭ تۇرعىنىنىڭ سۇراعى:-

-ساتبايەۆ-ماسانچي قيىلىسىن جاڭبىر كەزىندە سۋ باسادى. بۇل ماسەلەنى شەشۋگە كومەكتەسىڭىزشى.

الماتى اكىمى ەربولات دوسايەۆتىڭ جاۋابى:

- ءقازىر الماتىدا قۇرىلىس-جوندەۋ جۇمىستارىن جۇرگىزۋ كەزىندە نوسەر كارىزى بىرگە جابدىقتالۋعا ءتيىس. ءسىز كورسەتكەن قيىلىستا مەردىگەر جاقىن ارادا كارىز جۇمىستارىن اياقتايدى، بۇل جوبادا كورسەتىلگەن.

سۋ تاسقىنىن جويۋ ماقساتىندا جۇرگىزىلىپ جاتقان ارىق جەلىلەرىن جاڭعىرتۋعا سايكەس الماتىدا بارلىعى 300 شاقىرىمنان استام ارىق جەلىسى اۋىستىرىلىپ، سالىنادى. الدىمەن ءبىز ۇنەمى سۋ باساتىن جەرلەرگە نازار اۋدارامىز، بۇل تۇركسىب، جەتىسۋ سىندى قالانىڭ تومەنگى اۋداندارى. بىتەلگەن ارىقتاردى تازالايمىز. قالادا ارىق جۇيەلەرى ەسكى، كوبىنەسە اعاشتاردىڭ تامىرى ارىقتى بىتەيدى، ۇنەمى قوقىس جينالادى.

كەلەسى جىلى ارىق جۇيەسىن تازارتىپ تۇرۋعا، كۇتىپ ۇستاۋعا قاراجات ءبولۋ تۋرالى شەشىم قابىلداندى. ورتالىقسىزداندىرۋ اياسىندا اۋدان اكىمى سۋ تاسقىنىنا بايلانىستى ماسەلەلەردى شەشە الادى. بۇرىن اۋدان اكىمدەرى بيۋدجەتتىڭ جوقتىعىن ايتاتىن، ەندى ولار ءوز بەتىنشە جۇمىس ىستەي الادى. اۋدان اكىمىنە وسى ۋچاسكە بويىنشا جۇمىستاردىڭ ورىندالۋ بارىسىن قاداعالاۋدى تاپسىرامىن. 

ايتا كەتەيىك، زەرتتەۋ ناتيجەلەرى بويىنشا الماتى قالاسىنىڭ اۋماعىندا ۇنەمى سۋ باساتىن 102 اۋماق انىقتالدى، ولاردىڭ 56-سى اسا ماڭىزدى. 2022-2023 جىلدارى سۋ تاسقىنىن جەدەل جويۋ ماقساتىندا قالانىڭ وسى 56 پروبلەمالى اۋماعىندا قۇرىلىس-مونتاجداۋ جۇمىستارى اياقتالدى، ونىڭ اياسىندا قولدانىستاعى 13 كوللەكتور مەن 3 كانال قالپىنا كەلتىرىلدى، قوسىمشا 6 كوللەكتور مەن 6 كانال سالىندى، سونىمەن قاتار، ويجايلاۋ، بورالداي جانە قاراسۋ وزەندەرىنىڭ سول جاعالاۋىن نىعايتۋ بويىنشا جۇمىستار جۇرگىزىلدى. كوللەكتورلاردىڭ وتكىزۋ قابىلەتىن ەكى ەسە ارتتىرۋ بۇرىن ۇنەمى سۋ باساتىن اۋماقتاردا ماسەلەنى ءبىرجولا شەشۋگە مۇمكىندىك بەردى.

سونىمەن قاتار، الماتى اكىمدىگى 3 نەگىزگى باعىت (ورتالىق، شىعىس جانە باتىس) بويىنشا 276 كم قايتا جاڭارتۋ جانە 100 كم جاڭا ارىق جەلىلەرىن سالۋ بويىنشا اۋقىمدى جۇمىس جۇرگىزىپ وتىر. بۇگىندە ۇزىندىعى 84،8 كم بولاتىن 164 ۋچاسكەدە جۇمىس اياقتالدى.