الماتى ماڭىنداعى وزەن-كولدەردە سۋ دەڭگەيى كوتەرىلىپ، سەل ءجۇرۋى مۇمكىن.
«قازگيدرومەت» رمك جاريالاعان ەسكەرتۋگە سايكەس، الماتى قالاسىندا 22-24 ماۋسىم ارالىعىندا قاتتى جاۋىن-شاشىنعا بايلانىستى وزەن-كولدەردە سۋ دەڭگەيى كوتەرىلىپ، ءقاۋىپتى بەلگىلەردەن اسقان جاعدايدا تاۋ بوكتەرى مەن سوعان جاقىن اۋدانداردا سۋ تاسقىنى بولۋى مۇمكىن، دەپ حابارلايدى Almaty-akshamy.kz.
سينوپتيكتەردىڭ بولجاۋىنشا، 22 ماۋسىمدا جاۋىن جاۋىپ، نايزاعاي وينايدى. سولتۇستىك باتىستان سوعاتىن جەلدىڭ ەكپىنى سەكۋندىنا 15-20 مەترگە دەيىن جەتەدى. وسىعان بايلانىستى تجد تۇرعىنداردى جاقىن ورنالاسقان ارىقتار مەن كانالداردى قوقىستان تازارتۋعا شاقىردى.
الداعى تاۋلىكتەردە قازاقستاننىڭ باسىم بولىگى سيكلوننىڭ ىقپالىندا بولادى. نايزاعاي جارقىلداپ، جاڭبىر جاۋىپ، داۋىلدى جەل سوعادى. ەلىمىزدىڭ باتىسىندا، سولتۇستىگىندە، سولتۇستىك-باتىسىندا بۇرشاق جاۋۋى مۇمكىن.
22-23 ماۋسىمدا ەلىمىزدىڭ باتىسىندا، 22-24 ماۋسىمدا سولتۇستىك-باتىسىندا، 22 ماۋسىمدا ەلىمىزدىڭ سولتۇستىگىندە قاتتى جاڭبىر جاۋادى.